Polis di trafico a detene otro chauffeur cu a Hit & Run

ORANJESTAD (AAN): Diamars anochi, autoridad a haya nan ta atende un otro caso mas di Hit & Run. 

E dalmento fuerte aki a socede den Dakota riba e crusada di Caya Juancho Kock cu Caya Papa Huan Pablo II.

   Polis cu a yega ta topa cu un solo auto sedan basta kibra, y un persona herida.  E otro vehiculo na forma cobarde a bandona e lugar, pero no pa mucho largo.

   E auto cu a keda atras na e cruzada, ta un Kia Rio color shinishi, y e persona cu tabata den e auto a resulta herida.  E tabatin mester di asistencia medico.  Esnan eynan a splica cu e otro auto cu a huy bay ta un Honda sedan.

   Via di un tip, autoridad a logra haya sa unda e Honda aki a bay sconde.  E no tabata mucho leu di e lugar unda e accidente a sosode.

   Altura di ex Wimco na Dakota a bin topa cu e auto y e chauffeur, cu mesora tabata sa di kita e plachi di number, pues bo ta mira tur su mal intencion den e caso aki.

   Comunidad recien a protesta y exigi pa legisladornan introduci ley cu ta hisa castigo pa esnan cu comete Hit & Run.  E ta algo cu no ta wordo acepta den comunidad, y semper cu bo comete algo, bo mester sa di para den bo zapato y para responsabel pa bo acto.  Bo no por ta anti-social y keda cana rond sin ningun clase di consenshi.  Y ta mira cu ni maske cuanto a protesta, y ni kico a ser bisa, toch nan ta keda comete Hit & Run.

   Diamars anochi no tabata diferente.  Polis a detene y a bay cu ne.  El a purba di tapa cara pasobra e ora si el a haya berguenza.