Polis a gara Kitesurfer cu ta cruza di Venezuela te Aruba pa trece droga

Rugtas cu droga confisca --- ORANJESTAD (AAN): Nan a mire caba Diadomingo cu a pasa, y DIARIO a publica e relato den edicion di Diaranson. 

Esta con hendenan a mira un Kitesurfer cu fli color oranje ta bayendo direccion zuid rumbo pa Venezuela y el a hasta desaparece na horizonte.

   Awor a sali na cla, cu e Kitesurfer ey ta un Venezolano cu ta usa su conocemento di e deporte aquatico aki, pa cruza for di Peninsula di Paraguana yega te Aruba pa asina haci un dropping di droga.  Kizas e ta sali for di un boto cu ta nabegando den awa teritorial Venezolano, y di eynan e ta cruza lama.  Pero tin algun hende ta pensa cu e ta cruza e lama di Venezuela te Aruba sin haci uso di boto cu ta yude.

   Cuerpo Policial a informa cu Diaranson mainta pa 10:45 am a drenta un melding via Guardacosta di Caribe Hulandes, cu personanan atento canto di costa a wak un Kitesurfer biniendo aden na altura di Boca Grandi.

    Mesora funcionarionan di Guardacosta di Caribe Hulandes y di Cuerpo Policial a mobilisa y a bin haya un rugtas cu droga, paña, slof y e fli.

   Den cuadro di bon cooperacion y cu bon coordinacion entre Guardacosta di Caribe Hulandes, Guarda Nos Costa, oficialnan di KIA, polisnan di diferente distrito, K9 y helicopter a logra detene un hende homber como e presunto kitesurfer sospecha di a trece e rugtas cu droga.

   E sospechoso a worde deteni y e rugtas cu droga a worde hiba pa departamento di Crimen Organiza cu lo sigui cu e investigacion.

   Pues, tanto Diadomingo e lo a haci un dropping caba, y Diaranson su otro dropping a fracasa.  Y e ta haci esaki den dia cla, pa asina e tin bista riba lama.

   E potretnan aki pa cortesia di Guardacosta di Caribe Hulandes.