Polis a gara chauffeur coriendo 146 km/h riba Sero Tijshi

Preocupacion pa velocidad halto riba highway...

• Unidad motoriza a reparti 44 boet pa coremento duro 

​ORANJESTAD (AAN): Rond mundo ta conoci, cu coremento cu velocidad halto ta aumenta significantemente tanto e chens y severidad di accident di trafico debi cu e tempo di reaccion di chauffeur ta reduci drasticamente.  Tambe distancia di brake ta bira mas largo, y e energia di colision ta subi hopi.  Na Merca so, esnan cu ta core demasiado duro y ta kibra ley di velocidad maximo, ta hunga un rol den como 29% di tur accident fatal cu vehiculonan di motor, como cu velocidad mas halto ta crea instabilidad di e vehiculo, y ta dunabo menos tempo pa tuma maniobranan pa evita un accident.

   Na Aruba claramente den e ultimo dianan por a ripara cu tin varios accidente grave, y Polis mes ta bisa cu den esakinan ta velocidad halto a hunga un rol.

   Basa riba esaki y mucho mas, autoridad local a dicidi na haci algo den un forma preventivo pa asina yuda baha e cifra di accident y garantisa siguridad den trafico.  Consecuencia ta cu Cuerpo Policial Aruba a intensifica e controlnan rond di e isla.

   ​Diabierna anochi 20 di Februari 2026, e unidad motorisa di Cuerpo Policial tabata activo cu nan radar-gun pa tene un control pa cu velocidad halto.

   Esaki a tuma lugar na altura di Sero Tijshi. E resultado di e control aki ta duna un bista preocupante di e comportacion di algun chauffeur den trafico.

   Liliana Rasmijn kende ta vocero di Cuerpo Policial, a confirma na DIARIO cu un total di 44 chauffeur a haya boet pa maneha mas duro cu e velocidad maximo permiti.

   ​E caso mas extremo tabata un chauffeur cu a wordo gara coriendo na un velocidad di no menos cu 146 km/h.  Den pasado, chauffeurnan cu wordo gara cu velocidad asina halto tin chens cu nan ta hasta wordo obliga di presenta dilanti un Hues.

   ​Polis kier a manda un aviso cla y raspa  cu e controlnan aki lo sigui den e temporada aki.  Segun Rasmijn di Cuerpo Policial, hecho ta cu Polis ta enfatisa cu e meta no ta djis duna boet, sino pa evita desgracia cu por costa bida.

   ​Bo ta adverti! Tene bo mes na e regla nan di trafico of prepara pa ricibi boet halto. ​Ban sea mas consciente den trafico. Corda cu yega bo destino safe tin mas balor cu yega liher of no yega mes. Corda bo tin bo famia ta wardabo. Un trafico sigur ta responsabilidad di nos tur.