The content originally appeared on:
Diario
Oficial policial a sufri fractura complica
*Detencion di homber agresivo busca pa joyriding
*Arma di candela y municion a wordo confisca
ORANJESTAD (AAN): Diaranson mainta, diripiente den diferente bario por a tende monton di sirena ta sona. A resulta cu un caso serio di persecusion ta andando, y Central di Polis a solicita presencia di diferente otro unidadnan policial riba caya pa acudi den area di Noord pa ofrece sosten na e unidad.
Unidadnan di Polis e momento ey tabata coriendo tras di un Toyota Yaris sedan color blanco cu number A-49939 cu un hende so den dje ta tras di stuur. E persona aki tabata bisto cu cueste loke cueste lo no stop pa Polis, y tabata haci hopi maniobra riba caya pa evita di wordo gara.
Su estilo di core riba caya tabata trece trafico en general den peligro. Polis tabata su tras, debi cu e persona na stuur ta un sospechoso di Joyriding y ta wordo busca pa Husticia. Moviendo den area di Sero Janchi, porfin Polisnan a haya chens di “cera” e Toyota cu e no por a sigui mas, y eynan e persecusion a stop.
Scop fuerte riba Polis: Polisnan a baha bay mesora riba e Toyota Yaris, a habri e porta y a rek y baha e persona masculino for di auto. Pero el a cuminsa resisti fuertemente contra su detencion. Polisnan a actua rapido ora cu a mira cu den su poder e tin un arma di candela color preto.
Den e intento pa logra domin’e pa asina pone su mannan den boei, diripiente e agresor a cuminsa manda scop fuerte den varios direccion, y uno di nan a bay dal fuerte contra pia di un oficial di Warda di Polis di Noord. Esaki a causa dolor inmenso, y ta parce cu e scop ta asina duro, te cu el a ocasiona un fractura complica na pia di e agente policial.
Demas Polisnan a actua cu mas forza, kibrando su resistencia, y y asina a logra pone su mannan den boei y e no por a haci nada mas. Varios unidad di Polis a yega cerca y a cuminsa duna un man, y a seya full e lugar.
E arma di candela color preto, tipi pistol, a cay abao na suela. A lage eybao, pa asina e ekipo forensico di BFTO por bin investiga.
Arma haya cu bala: A core pidi presencia di Ambulans pa yega duna asistencia na e agente policial cu a keda cu inmenso dolor. Paramediconan na nan yegada a spalk e pia, y despues a opta pa rapidamente bay cune Hospital pa ricibi un tratamento cu sigur lo bay tarda hopi luna.
Personal di ekipo forensico a confisca e arma, y a descubri cu e tin bala aden tambe.
Ademas di Polisnan di Noord, na e lugar a mira presencia tambe di Recherche di Noord, Polis di Bario, Polis di Santa Cruz, Polisnan di K-9 Unit, Polisnan Motoriza, Staf di Distrito Noord, Sr. Henriquez, tambe Comisario Candelaria, y Alto Comisario drs. Ramon Arnhem a yega eynan.
Vocero di Polis a confirma na DIARIO, cu despues e dos Comisarionan aki a mobilisa pa Hospital pa haya update di e agente policial herida. Su condicion no ta critico mas.
Varios persona a reacciona pa puntra si acaso e persona deteni, tin di haber cu e caso di algun luna pasa ora cu a bin haya monton di articulo horta den un Garashi na Sero Janchi. Nan ta disgusta cu tin hendenan sin escrupulo cu ta bin daña e ambiente di e bario aki, y ta spera cu autoridadnan lo por sigui atende e asunto aki.
E investigacion ta sigui awor den man di Recherche di Noord pa check den ki crimen mas e homber aki lo ta envolvi. Tambe lo check cu Joyriding Team pa haya sa mas aspecto di e auto, y cu BFTO lo por duna claridad si acaso e pistol confisca a wordo usa recien den cualkier crimen violento riba e isla.
Na e oficial di Polis herida, DIARIO y tambe Cuerpo Policial ta manda palabranan di pronto recuperacion.
