Paulita (Ita) Ramona Ridderstaat ta ricibi Premio Ovito Tromp 2026 durante Fiesta

Arubiano na Centro di Bario Noord

ORANJESTAD (AAN):  Un comite independiente a selecciona Señora Paulita Ramona Ridderstaat

cariñosamente yama Sra. Ita como e ganadora di e Premio Mr. Ovito Tromp pa aña 2026. E

entrega di Premio Mr. Ovito Tromp pa aña 2026 na Señora Ita, lo tuma lugar durante e

celebracion di e Fiesta Arubiano, cu ta e tradicional celebracion di nos Himno y Bandera na

Centro di Bario Noord (CBN).

E premio Mr. Ovito Tromp ta distingi Señora Ita pa su trayectoria largo y invaluable como

boluntario den e comunidad di Noord y tambe mas aya.

Directiva di Centro di Bario Noord a bishita Señora Ita na su cas, diahuebs ultimo, unda a dun'e

e grato noticia cu CBN lo entrega na dje e Premio Mr. Ovito Tromp pa aña 2026 como muestra

di gran aprecio pa tur su trabounan desplega como boluntario den diferente ramo.

Sra. Ita a informa cu e no tabata spera e premio aki y cu e ta doblemente felis y e ta acepta e

Premio Mr. Ovito Tromp, tambe na memoria di su mama. Su trabounan como boluntario ta nace

for di un tradicion familiar profundo: como yiu muher di Dorothea "Do" Ridderstaat-Gil

(1930-1997) y Señor Chepi Ridderstaat, ela hereda un vision di responsabilidad comunitario. Su

mama, kende a dedica decadas na trabou boluntario a fungi como e inspiracion principal pa su

trayectoria.

Señora Ita ta casa cu Señor Henk Monah.

Sra Ita a bay studia na Hulanda na aña 1969. Sra Ita a cuminsa su bida laboral na Aruba na

aña 1974 como asistente di dokter di Dr. Weststrate y Dr. Berlinski na Centro Medico San

Nicolaas.

Na aña 1990 ela bolbe bay Hulanda pa sigui specialisa su mes.

Desde 1992 te cu su edad di pensioen su persona a labora na Horacio Oduber Hospital como

enfermera.

Na Aruba, su labor como boluntario a abarca varios decadas y areanan:

- Señora Ita tabata miembro di directiva di Centro di Bario Noord (CBN)

- Señora Ita ta fungiendo como boluntario pa Wilhelmina Kanker Fonds ya pa 27 aña, despues

di fayecimento di su mama.

- Señora Ita a lidera grupo di AMG.

- Señora Ita tambe a lidera Arubaanse Padvindsters Gilde (Meisjesgilde).

- Señora Ita a fungi como un miembro di directiva di SAC y despues a ser nombra Miembro

Honorario di SAC.

- Señora Ita ta un cantante den Coro di Sta. Anna.

- Señora Ita ta resa cu famia ora di entiero y ta guia.

Sra. Ita a y te ainda ta duna guia, asistencia y conseho informal na hobennan, mayornan,

enfermonan y tambe famianan na luto.

Su labor a ser caracterisa pa humildad, positivismo y un dedicacion silencioso pero efectivo y

cu un impacto social cultural sin igual den fortalecemento di nos hubentud y ora di duna sosten

na nos adulto mayornan, pashentnan di cancer, y tambe a aporta na nos Carnaval.

E comite independente a enfatisa cu Señora Ita ta representa un alma bunita cu un curason di

oro puro y su impacto riba comunidad ta visibel den e lidernan cu el a forma y e consuelo cu el

a ofrece durante decadenan na hopi cu ta consider'e famia y ta eternamente gradecido na dje.

galleryPaulita (Ita) Ramona Ridderstaat ta ricibi Premio Ovito Tromp 2026 durante Fiesta/gallery