Partido Futuro ta contento di a keda cla rapido cu total di firma y ratifica su luga den eleccion

ORANJESTAD (AAN): Cu hopi entusiasmo y orguyo Partido FUTURO a mira con, riba e prome dia caba,

a alcansa e cantidad minimo di firma di apoyo necesario pa participa den eleccion parlamentario di dia 6 di december 2024. E hecho aki ta testimonio di e entusiasmo cu ta reina den comunidad pa e propuesta nobo cu FUTURO ta trece y ta anima henter e ekipo di candidato pa trece e mensahe den tur skina di e isla.

   E respaldo cu comunidad ta duna FUTURO ta representa un stap mas den direccion di un era nobo caminda Transparencia ta hiba na un bon gobernacion, Unidad ta fomenta un mayor cohesion den comunidad y nos ta biba den un pais cu ta Representa e interes di absolutamente tur ciudadano.

   TEAM di FUTURO tabata presente dialuna na Dependance di Censo pa yama bon bini y danki na tur cu a bin sostene e partido. Nan ta gradici tur cu a manifesta nan confianza den e vision di FUTURO. Yega na e 586 firma prome cu final di e prome dia ta un mensahe cla di aceptacion pa nan filosofia y e lista cu a presenta diabierna ultimo na Conseho Electoral.

   E ekipo di FUTURO ta consisti, ademas di Gerlien Croes y Geoffrey Wever na number 1 y 2, di #3 cu ta Gino Goeloe, enfermero y personahe conoci den sector di salubridad y social, #4. Ruthlyn Lindor, Criminologo y Docente Prome Grado, #5. Muzaninn Wever, Hurista Legislativo; #6. Gregory Ras, Ingeniero y Empresario; #7 Jeremy Erasmus, Specialista den negoshi y mercadeo y entrepreneur, #8. Rondell Heyliger, Entrepreneur ; #9 Della Lopez, Docente y sindicalista; y #10. Omar Quandus Inspector di welder industrial

Awo FUTURO ta invita comunidad completo pa uni na e movemento, conoce e candidatonan cu lo ta e voz di nan inkietud y aspiracionnan y pa forma parti di e cambio votando den e eleccionnan di 6 di december proximo pasobra hunto nos por construi un miho FUTURO pa Aruba.