Parlamento ta duna ‘go’ na ley pa frena ‘Hit and Run’

Shailiny Tromp-Lee di MEP:

• Tambe lo atende coremento roekeloos riba caminda
• Firmesa y profesionalismo pa un trafico mas sigur 

ORANJESTAD (AAN): Durante e reunion publico di dia 25 di februari 2026, Parlamento di Aruba a marca un paso decisivo pa siguridad riba nos careteranan. Como parlamentario, Shailiny Tromp-Lee a hiba un disertacion enfoca riba e necesidad urgente pa transforma nos leynan di trafico den hermentnan real di proteccion.

   E situacion actual, caminda accidentenan grave a bira "rutina", no por wordo tolera mas den un sociedad moderno.

   Un marco legal sin buraco: Segun Shailiny Tromp-Lee di MEP, el a duna su sosten pleno na e iniciativa legislativo di su coleganan Rocco Tjon y Edgard Vrolijk. Pa hopi tempo, tabatin "buraconan" legal cu tabata stroba autoridadnan di actua contra conductanan extremadamente peligroso prome cu un tragedia mes sucede.

   Cu e introduccion di Articulo 2a, nos ta pone un stop na esaki. Awor tin un definicion cla pa kico ta roekeloosheid (manera core den luz cora, uza celular of "bumperen").  Mas importante ainda: e castigo pa e falta di respet aki pa bida humano ta subi te na un maximo di 8 aña di prizon. Aki nos ta manda un mensahe fuerte: bida no tin prijs.

   Exigencia pa Resultado: Como parlamentario, Tromp-Lee no ta limita mi mes na djis aproba un ley; mi ta vigila su ehecucion. Pa e ley aki no keda djis riba papel, mi a exigi di Gobierno, y especificamente di Minister di Husticia, un enfoke riba tres punto clave:

   (*) Handhaving y Bijscholing: No por tin confusion riba caya. Mester percura pa nos cuerpo policial tin e training y e medionan necesario pa identifica y actua contra e conductanan aki mesora.

Prevencion Tactico: E grupo di 18 pa 21 aña ta esun di mas riesgo. Shailiny Tromp-Lee a pidi pa plan nan concreto cu ta combina e forsa di ley cu conscientisacion den scolnan secundario.

Evaluacion Critico: E ley ta stipula un evaluacion despues di 5 aña, pero pa mi esey ta demasiado leu. Mi a urgi pa un evaluacion intermedio despues di 2 aña. Nos mester sa si e medidanan ta funciona of si mester ahusta e direccion mas trempan.

   "Un ley no ta stuur un auto; e chauffeur ta esun cu tin e control. Castigo mas halto ta un parti di e solucion, pero e kura real ta den nos consenshi. Cada bes cu bo gara un stuur, bo tin e bida di bo famia y di otronan den bo man. Responsabilidad propio ta e prome y e miho capa di seguridad cu nos por tin."

   Conclusion: E cambio di ley aki ta un instrumento fuerte, pero su exito ta rekeri un triangulo perfecto: un ley sin faya, un Gobierno cu ta mantene e ley debidamente, y un pueblo cu ta asumi su responsabilidad. Como boso representante, e lo keda monitoria e proceso aki cu e mesun rigor y profesionalismo cu e tema aki ta exigi.