Parlamento a debati tocante cuido di Adultonan Mayor

Reaccion di Evelyn Wever-Croes di MEP:

• Total di 4 mocion aproba unanimamente 

ORANJESTAD (AAN): Diahuebs ultimo Minister di Asunto Social Mervin Wyatt-Ras tabata den Parlamento pa elaborariba su maneho di adultonan mayor. 

   Lider di fracccion di MEP, Evelyn Wever-Croes riba esaki a declara: “Mi a scucha cu hopi atencion pa scucha kico nos ta bay haci pa yuda nos adultonan mayor mehora nan calidad di bida. Pasobra e desafionan y retonan ta grandi.”

  “Pesey den nos gobierno, Gabinete Wever-Croes 2, nos a apunta un ministerio especial pa cuido di adulto mayor, cu e gobierno aki lamentablemente a elimina. Pesey nos a bin cu Directie Ouderenzaken, un logro di nos gobierno di cual mi ta hopi orguyoso, y mas orguyoso ainda di mira cu gobierno a continua cu e proyecto aki.”

   Pero mi a keda hopi desapunta, pasobra ora cu mi a pensa cu despues di un aña di gobernacion AVP-Futuro, ya tin planes concreto den ehecucion, cu nos adultonan mayor por mira di berdad cu tin mehoransa pa nan, no tin.”

   “Awe mi a scucha e minister bisa 73 biaha cu e ‘sondeando’, e ta ‘wardando e sondeo’. Despues di 1 aña di gobernacion ainda bo ta ‘sondea’? Esey no ta bon. E gobierno aki tin maximo dos aña mas pa implementa nan vision, esey ta si gobierno no cay prome. Pasobra despues campaña ta cuminsa y ta bin eleccion.

   E problema ta urgente, y pesey mirando e bashi cu gobierno a laga, Parlamento a presenta 4 mocion. Mi ta hopi orguyoso di mira e mocionnan cu e parlamento aki a trece padilanti. Mocionnan cu ta pidi strategia y pasonan concreto den 2 luna y mocionnan pa genera entrada pa logra e metanan. Tur 4 mocion a wordo aproba unanimamente.”Lider di Fraccion di MEP a declara na final di e reunion.