Parlamentario Xiomara Maduro ta felicita FIU Aruba cu nan 30 aniversario

ORANJESTAD (AAN): Parlamentario Xiomara Maduro ta felicita Financial Intelligence Unit Aruba (FIU Aruba) cu nan 30 aniversario di existencia.

Un logro significativo cu ta refleha tres decada di compromiso den proteccion di e integridad di nos sistema financiero.

Parlamentario Maduro tin un laso special cu FIU Aruba, ya cu entre aña 2003 te 2009 ela a traha como funcionario di maneho na Meldpunt Ongebruikelijke Transacties (MOT), e nomber original di e departamento. Den e periodo aki Maduro a logra gana experiencia balioso den sector gubernamental, cual a forma e base pa su entrada despues den politica na augustus 2009.

Durante su trayectoria como Minister, desde november 2017 te cu maart 2025, Maduro a sirbi como Minister di Finansa, den cual funcion FIU Aruba tabata resorta bou di su responsabilidad. Durante e periodo aki, a construi un relacion di trabou solido y fructifero cu e departamento, cu a resulta, entre otro, den fortalece e posicion internacional di Aruba riba tereno di supervision financiero, incluyendo participacion na organisacion regional CFATF y evaluacionnan positivo cu a posiciona Aruba como un di e paisnan lider den Caribe cu un sistema financiero integro.

Pa e ocasion special di e 30 aniversario, Parlamentario Maduro tabata presente na e encuentro conmemorativo organisa pa FIU Aruba. E programa a consisti di diferente charla interesante y intercambio di conocemento riba tema relevante manera origin di lucha contra labamento di placa y e importancia pa prepara di tempran pa e evaluacion di Aruba door di CFAFT den aña 2029.

Parlamentario Maduro ta expresa su aprecio pa tur empleado y ex-empleado di FIU Aruba pa nan dedicacion y profesionalismo durante e añanan. “FIU Aruba a demostra di ta un pilar importante den proteccion di nos economia y reputacion internacional. Mi ta orguyoso di a forma parti di su historia y ta desea e institucion hopi mas exito den futuro,” Maduro ta expresa.