Lider di Fraccion di AVP
ORANJESTAD (AAN): Den cuadro di e audiencianan regular cu Gobernador di Aruba, Sr. Alfonso Boekhoudt, lider di fraccion di AVP na Parlamento, Señora Jennifer Arends-Reyes, a cumpli diabierna ultimo cu e bishita institucional pa un intercambio di idea y informacion riba diferente tema di interes nacional.
Durante e audiencia, a papia entre otro tocante desaroyo politico actual, responsabilidad constitucional di Parlamento, y e importancia di un colaboracion continuo entre e institucionnan pa garantisa stabilidad, gobernabilidad y bienestar di pueblo Arubano.
Señora Arends-Reyes a subraya cu e audiencianan regular cu gobernador ta forma parti di un proceso democratico importante, cu ta contribui na transparencia, dialogo y respet mutuo entre e diferente podernan di pais. Segun e lider di fraccion, e tipo di encuentro aki ta fortalece e rol di Parlamento den proteccion di interes general y e Estado di Derecho.
“Como representante electo di pueblo y lider di fraccion di AVP, ta esencial pa mi mantene un comunicacion habri y respetuoso cu gobernador, na beneficio di pais y su pueblo,” asina Arends-Reyes a declara.
Como parlamentario y lider di fraccion AVP, Señora Arends-Reyes ta continua comprometi cu e responsabilidad serio y constructivo di su labor parlamentario, semper poniendo e interes di Aruba y su ciudadano na prome lugar.
