Parlamentario Evelyn Wever-Croes a entrega keho contra menasa di morto ricibi

ORANJESTAD (AAN): Menasa di morto ta un acto criminal hopi serio y ta rekeri pa raporta esaki di inmediato na autoridadnan pa asina proteha esun cu ta wordo menasa, y preveni escalacion y daño.

   Den su disertacion dialuna durante e reunion publico di Parlamento pa trata e Landsverordening Instelling Ministeries (LIM), Parlamentario Evelyn Wever-Croes a menciona un menasa di morto cu e lo a ricibi di un tal meneer Williams, un persona supuestamente hopi yega na Minister Gerlien Croes.

   Segun Parlamentario Wever-Croes, e menasa di morto ta pa motibo cu, como un parlamentario di nos pais, e ta cuestiona Minister Gerlien Croes publicamente.

   Segun Parlamentario Wever-Croes, e prome menasa cu el a ricibi ta dia 26 di November 2025, dia cu Partido MEP a conmemora fayecimento di señor Betico Croes den santana na Santa Cruz. Señor Williams e dia ey a post riba su Facebook “Bay wak si tin luga pa bo den e santana ey”. E di dos post cu e parlamentario ta considera un otro menasa ta “Pone un arma na bo cabes y tira, asina tur hende ta contento cu bo no por habri bo boca mas”. E di tres menasa cu WiIliams a skirbi ta “Mi a spera cu bo por lanta stijf hopi lihe, (su deseo di fin di aña)”.

   Parlamentario Wever-Croes a remarca den e reunion cu el a entrega keho contra Williams pa menasa di morto na su persona. El a enfatisa tambe den un post riba su Facebook cu niun menasa lo por silenci’e ni strob’e di haci su trabao.