Parlamentario Evelyn Wever-Croes a bay mira expo y documentario ‘Faces of Art’

ORANJESTAD (AAN): Durante fin di siman señor Peter van den Heuvel a organiza un exposicion y e prome documentario “Faces of Art”.

Señor Peter van den Heuvel cu ta un artista su mes, a entrevista 8 artista local pa asina e por captura e spirito y talento di cada un di nan.

   Basa riba e informacion cu el a colecta di cada un, el a traha un documentario, y despues el a crea un portrait di cada un. E artistanan aki ta Kevin Gumbs, Kyle Winklaar, Xalsky Schwengle, Mitch Almary, Kim Violenes, Ryan Tromp, Paul Wong y Adriana Cereste.

  Pa expone e bunita trabao di cada un di e artistanan local aki via e documentario, señor van den Heuvel a organiza e exposicion pa asina publico en general por pasa pa admira su arte. Riba e dia aki tambe tabata presente tur e artistanan cu el a pinta pa asina nan por aprecia e bunita trabao cu señor van den Heuvel a crea di cada un di nan.

  Parlamentario pa fraccion di MEP Evelyn Wever-Croes tabata presente y a expresa di ta sumamente bunita pa mira con un artista, Peter van den Heuvel ta honra otro artistanan local dunando nan e balor pa comunidad sera conoci cu nan. El a expresa cu esaki ta e union cu Aruba mester pa nos cultura y nos artistanan local por sigui crece.

  Parlamentario Wever-Croes ta felicita y gradici señor Peter van den Heuvel pa e bunita exposicion y documentario, y tur esnan cu a haci esaki posibel.