Pakico a uza democracia pa ganashi politico scondi?

Prome reunion Parlamento 2025 ta marca historia politico di pais

• Promesa falso pensioen di behez a cambia resultado eleccion
• Intento falso pa susha nomber Wever-Croes a destrui su sosten 

ORANJESTAD (AAN) Awe un constelacion nobo di Parlamento di Aruba lo mester wordo huramenta a base di e resultadonan di eleccion cu a bira necesario pa motibo di traicion politico den Gabinete Evelyn Wever 2.

   Inicio lo wordo duna na e periodo cu lo entrega na Pueblo di Aruba e berdad di unda y pakico e rabo di porco ta krul!

   No tabata tin ningun motibo factibel pa Gobierno Evelyn Wever-Croes a wordo tumba cu accion di partido Raiz, cu a entrega Aruba un serie di pregunta pa cual sigur mester bini contesta.

   Cambio di 2024 pa 2025 no ta nifica ningun motibo pa DIARIO entrega su punto di bista marca riba e cuadro di leynan y e comportacion politico basa riba democracia real.

   Voto di Pueblo di Aruba a wordo uza pa maniobra sumamente serio pasobra no tabata tin ningun motibo factibel pa papia di un crisis den Gobierno Wever-Croes, cu hasta a guli mas cu e mester a guli na man di partido Raiz, cu kier a comete suicidio.

Prome cu weganan politico a start, Prome Ministro Evelyn Wever-Croes y e maneho cu e tabata hiba pa por a entrega Aruba e solucion di mas grandi cu e pais tabata tin mester cu ta suficiente placa pa cumpli cu tur necesidad social di Pueblo di Aruba, tabata tin sosten total di Pueblo di Aruba.

Tur indicacion tabata cu AVP lo a bira e perdedor di mas grandi den eleccion y hasta lo a bira partido chikito, a base di e pruebanan palpabel di corupcion di parti di AVP manera lo bini dilanti den Corte Supremo di Reino na Den Haag na 2025.

Na 2025 un campaña feroz a cuminsa contra persona di sigur Evelyn Wever-Croes cu tabata tin un posicion asina fuerte den Pueblo di Aruba cu ni e intentonan bajo den seno di Parlamento pa daña su nomber y reputacion y mande cas prome cu eleccion, a logra.

E respaldo di Pueblo pa Evelyn Wever-Croes como lider di Aruba a expresa su mes den e cantidad di voto cu el a ricibi y cu a mantene como votegetter mas grandi.

Pero tur esaki no ta mishi cu e pregunta mas serio cu mester wordo haci na momento cu un constelacion nobo ta tuma asiento den Parlamento, cu no ta sede di partidonan politico pa traha pa nan beneficio personal of di partido, pero ta e sede pa traha na beneficio di henter Pueblo di Aruba, cu awor por goza di loke a wordo kita for di Pueblo di Aruba na 2014, ora Aruba a wordo entrega na Gobierno di Reino.

Awor, a base di e maneho di Evelyn Wever-Croes, tin placa den caha di Aruba pa traha pa e Pueblo di Aruba, cu a wordo abusa dor di cantidad di crimen politico den seno sigur di AVP manera sentencianan di Huez contra gobernantenan di AVP ta demostra.

Kico tabata e motibo di e traicion di Raiz, cu a kibra tur normalidad pa su integrante bira lider di un partido nobo pero na mes momento uza Gobierno di Evelyn Wever-Croes pa e sigui gana placa como Ministro?

E eleccion 2024 no tabata tin ningun motibo directo cu no ta wega di Raiz pa baha Gobierno y asina habri porta pa cambia panorama politico di Aruba cu mentira y situacionnan dudoso cu ta fuera di normal den mundo politico.

E promesa falso di subi pensioen di behez cu un suma enorme na momento cu tur fondo di seguro social na mundo ta na careda y pensioen di behez hasta na peliger na paisnan grandi, ta entrega prueba di manipulacion di Pueblo di Aruba, cu a wordo uza pa propositonan cu te awor ta desconoci.

Loke a pasa na Aruba na 2024, ta sumamente dudoso mas ainda si tene cuenta cu Reino no ta permiti pa deshaci di medidanan cu mester evita otro desastre financiero pa Aruba.

Pueblo di Aruba na 2024 a bira victima di engaño y ta un Gobierno basa riba promesanan di engaño lo mester nace proximamente despues cu awe bofon ta wordo haci cu e sistema politico di Aruba, cu a produci solamente beneficio pa politiconan cu a base di resultado di eleccion por bay goza di mas placa di Pueblo den Parlamento cu lo cambia di constelacion.

Un Gobierno di engaño ta mira luz na Aruba, cu ta mira e mes personanan cu a separa di otro, reuni, pa hunto forma e Gobierno di AVP y partido Futuro cu no ta nada mas cu e garoshi pa “ban cas bek”di AVP!