Pa ken nos Gobierno ta goberna, pa pueblo of pa un grupo chikito

Ivo Valdes di OPPA ta puntra:

ORANJESTAD (AAN): Segun señor Ireno ‘Ivo’ Valdes di Organizacion di Penshonadonan Publico di Aruba (OPPA), e guera cu ta tumando luga tin influencia sea directo of indirecto riba nos pais. Ya caba, gasolin a subi basta. Y hunto cu esaki, tur otro cos lo subi tambe. Señor Valdes a expresa cu apesar cu e pensionadonan a haya reparatietoeslag, inflacion ta bay cu esaki.

   Segun e, enbes cu Gobierno bringa pobreza, Gobierno ta manehando pobreza. Na momento cu gobierno duna reparatietoeslag, cu ta un cachi cachi, pa hende keda trankil, esaki no ta suficiente. E ta cuestiona cu si gobierno kier yuda su hendenan, pakico no hinca e cen aki den pensioen y no como reparatietoeslag.

   “Nos ta bringando keto bay cu e prijsnan. Gasolin a subi, costo di bida a subi. Cuminda ta bay bira luho. . No tin suficiente cas di cuido pa e lista di espera cu tin. Pensionadonan ta bay sufri mas. Ta nos ciudadanonan, specialmente nos pensionadonan ta bay paga e prijs pa esakinan”, el a expresa.

   Señor Valdes ta cuestiona, si den tur loke ta sosodiendo actualmente, si gobierno tin un plan pa proteha nos pueblo. Si Gobieno tin un vision pa e mundo cu cada dia ta birando mas peligroso. Si Gobierno tin un plan di accion pa e costo di bida cu ta aumentando. Un cos si, el a enfatisa: “Pueblo no por sigui wak y spera. Nos no por sigui depende completamente sin un preparacion adecua. Si mundo ta cambia, Aruba tambe mester cambia. Mester ta prepara”.

   Aruba siendo un pais cu ta depende di turista, tin entrada di turismo. Segun señor Valdes nos grandinan no ta esnan cu ta goza di e entradanan ey. Bisando esaki, e pregunta cu e ta haci ta: “Pa ken nos gobierno ta goberna. E ta goberna pa pueblo of pa un grupo chikito?”