Pa 100 dia largo Heintje lo drumi riba un cot den Mina di Fosfaat

ORANJESTAD (AAN): Aunke den pasado den un relato exclusivo den DIARIO, ya caba Heintje Ras a divulga cu e lo bay haci un hazaña grandi.

Finalmente e siman aki el a anuncia esaki oficialmente.  Un hazaña di keda 100 dia bao tera, den e Mina di Fosfaat na parti pariba di Aruba.

   Henry ‘Heintje’ Ras ta cla pa esaki!  E ta actual prresidente di Fundacion Museo di Antiguedad nos Bieunan.  El a splica cu e momento cu e drenta Mina di Fosfaat, e lo mester tene na cuenta cu un serie di exigencianan pa cumpli cu nan, entre otro:

(*) E no por wak solo ni luna.

(*) No mag di tin kampvuur eybao.

(*) No por tin Wi-Fi, mester ta sin coriente.

(*) No mag di tin telefon of tablet.

(*) Sin cuminda; solamente awa cu fruta.

   Ras ta gradici e team grandi cu e tin su tras y e boluntarionan. Henter e team aki lo bay sostene ora cu e baha y drenta den e Mina di Fosfaat.

   Hazaña di 100 dia:  Segun Heintje Ras a splica, tabata su yiu Alzacary Ras a bise cu e World Record ta 69 dia, anto ora el a mustra Ras esaki, y a bin cu e idea pa kibra e world record aki cu 70 pa 80 dia cu lo haci e evento mas atractivo. Un amiga, Vivian Kock a bis’e, cu e kier bay 80 dia...  di con e no por bay 100 dia di biaha?  Eynan a bini e 100 dia cu awe ta papia di dje.

   Guinness Book of World Records ta exigi pa e tipo di hazaña aki mester tin un Docter cu ta disponibel den 15 minuut ora cu yame den caso di emergencia.  Heintje Ras a splica cu el a scoge pa ta ekipa cu 2 Docter y Rode Kruis pa yuda den caso di emergencia.  Tambe Cuerpo di Bombero cu ta bay midi e nivel di oxigeno eybao a traves di nan ekiponan sofistica.

   Den e 100 dianan ey, Ras lo baña cu awa di ijs, lauw.  Y pa e haci su necesidadnan, e lo tin hemchinan special y lo tin hende cu tur dia lo deshaci di nan y trece nobo.

   “Mi no mag di tin cama, ni airco, ni fan. Kizas den forma di cot pa mas safe contra pica di bestia,” Ras a indica.

   El a splica cu e ta preparando su forma di come door di un programa cu e conocido nutricionista Rene Wild lo traha, comiendo fruta y likido den e dianan cu e lo ta den e mina di fosfaat.

   Proyecto di Fundacion: E Hazaña aki ta bay pa duna empuhe na un proyecto cu e Fundacion ta haci riba su mes.  Segun Heintje Ras, pa 4 aña el a cana tras di gobierno pa un edificio of un tereno pa traha un Museo pero e no a logra haya ayudo for di Gobierno.

   E suma cu e mester pa realisa e proyecto aki ta 2.5 miyon Florin, sinembargo e no ta  bay pa recauda 2.5 miyon Florin cu e hazaña aki, pero cu si e lo por haya e suma suficiente pa por start cu e Mega Museo pa Aruba. Banda di esaki e tin fondonan caba disponibel pa worde deposita riba cuenta di e Fundacion, pero pa esaki e hazaña tin cu bay ON.

   Door di esaki, Ras a dicidi cu e ta bay logra esaki riba su mes sin ayudo di gobierno, pero cu donacionnan nacional y internacional.

E por bay bon y e por bay malo, pero su meta final ta pa recauda fondo y traha un Mega Museo pa Aruba.