O’STAD Incubator a culmina cu Demo Day y pitch di startups local

Minister Geoffrey Wever:

ORANJESTAD (AAN): Minister di Finansa, Asunto Economico y Sector Primario, mr. Geoffrey Wever ta anuncia cu diasabra ultimo, Impact Hub Aruba a celebra e culminacion oficial di e O’STAD Incubator cu un Demo Day inspirador, unda nuebe startups local a presenta nan negoshi den e etapa final di un trayectoria intensivo di incubacion. E evento a representa un milestone importante den e desaroyo di entrepreneurship y innovacion na Aruba.

   Durante un periodo di tres luna, e startups participante a completa un programa intensivo di incubacion, ricibiendo capacity building y orientacion profesional for di mas cu 25 experto for di academia y sector priva. Entre otro, nan a wordo prepara riba creaccion di modelo di negoshi, validacion di mercado, posicionamento strategico y presentacion na inversionistanan.

   Di e 11 startups cu a cuminsa e trayecto, 9 a logra finalisa exitosamente, di cual 7 a presenta nan pitch na un panel di inversionista, business leaders y stakeholders local. Durante Demo Day, e empresarionan a comparti nan vision, progreso y potencial di mercado, demostrando e crecemento concreto cu nan a logra por medio di e incubacion.

   Tres ganador a wordo selecciona y lo sigui den un proceso di post-incubation, cu e obhetivo pa fortalece nan sostenibilidad y aumenta e probabilidad di exito comercial a largo plaso.

   E O’STAD Incubator ta un iniciativa di Impact Hub Aruba, den colaboracion cu Universidad di Aruba y Camara di Comercio, y ta wordo patrocina door di SETAR, Aruba Airport Authority y Aruba Tourism Authority.

   Minister Geoffrey Wever, tabata presente durante e Award Ceremony y a enfatisa e importancia di sigui inverti den entrepreneurship como pilar pa diversificacion economico, creaccion di empleo y un ecosistema di innovacion resiliente. Segun minister Wever, iniciativanan manera O’STAD Incubator ta demostra con colaboracion publico-priva por traduci ideanan nobo den negoshinan concreto cu ta crea balor real pa economia di Aruba.

   Impact Hub Aruba, funda na 2022, tin como proposito sostene entrepreneurship di un manera sostenibel y contribui activamente na un economia mas dinamico, innovador y inclusivo pa Aruba.