Organizacion OPPA a manda carta pa Secretario di Estado pa expresa nan preocupacion

Preocupa cu loke ta pasando cu gobernantenan y democracia

ORANJESTAD (AAN): Prensa tambe a haya copia di un carta cu Organizacion di Pensionadonan Publico di Aruba (OPPA) a manda Diaranson dirigi pa Secretario di Estado di Asuntonan di Reino, esta Szolt Zsabó.  A manda copia pa Gobernador di Aruba y tambe President di Staten.

   Den e carta, OPPA a trece dilanti su preocupacion pa loke ta pasando den e dianan aki cu cierto miembro di Gobierno, y cu democracia na Aruba.  Nan ta splica cu pueblo di Aruba no merece loke ta pasando, y no ta contento cu e forma cu ta gobernando e pais aki.

   Ivo Valdes como president di OPPA a bisa cu nan ta hopi preocupa y pesey ta manda e carta pa Secretario Zsabó riba e estado actual di gobierno, cu na su opinion ta forma un menaza serio pa funcionamento di democracia.

   Nan a expresa nan preocupacion di desaroyonan recien dentro di e Gobierno demisionario di coalicion, consistiendo di partidonan MEP y RAIZ.  A menciona con un Ministro di MEP sospecha di actonan incorecto, a entrega recien su retiro.  Esaki ya caba ta algo preocupante, pero e situacion a empeora ora cu mayoria di Parlamento a tuma un mocion di desconfianza contra un otro Ministro di MEP, encarga cu Enseñanza.

   Tambe e posicion di Partido RAIZ a mustra di ta instabil.  Ministro Demisionario di RAIZ a entrega su retiro na su partido, y a pasa over pa un otro partido cu ainda no tin un status oficial.

   E desaroyonan aki ta trece hopi confusion y preocupacion den pueblo.  Con ciudadanonan por tin confiansa den un Gobierno cu ta wordo afecta pa asina hopi iregularidad y instabilidad.  E partidonan cu tin e responsabilidad pa guia e pais, ta parce di ta mas dirigi riba lucha interno pa poder y interes personal, envez di traha pa interes general.

   OPPA den e carta ta puntra e gobernante Hulandes, ta kico pueblo por spera den circunstancianan asina?  Con por confia cu Gobierno lo bay tuma su responsabilidad y traha na beneficio di comunidad, siendo cu ta evidente cu falta unidad y instabilidad den coalicion?  Nos ta puntra nos mes ki paso lo wordo tuma pa asina soluciona e crisis aki y trece confiansa bek den pueblo den e institucionnan politico.

   OPPA ta haci suplica na Secretario Zsabó como representante di Cas Real y cuidado di balornan democratico y e ordo Constitucional di Aruba, pa vigila e situacion aki di cerca y si ta necesario, tuma pasonan urgente pa asina trece confianza bek di pueblo den gobernacion.

   Ta di interes crucial cu tin di bin claridad riba con e iregularidadnan aki ta wordo maneha y cu e interes di pueblo semper lo keda como prioridad.  Den temponan di inseguridad y instabilidad politico mester di liderato cu ta uni pueblo y ta keda mantene pueblo riba e direccion corecto pa un mihor futuro y caminda e bienestar di cada ciudadano ta poni central.