Ora ‘ego’ bira demasiado grandi, e por crea un distancia entre nos mes y otro hende

Ego ta un palabra cu ta referi na un parti di nos personalidad. Den termino simpel, ego ta e idea di “mi” cu nos tin di nos mes,

un sentido di identidad cu por influencia nos manera di pensa, tuma accion, y interactua cu otro hende. Ego tin dos cara: e por ta un stimulante positivo, pero tambe un obstaculo.

Di un manera positivo, ego por duna nos confiansa pa logra meta y defende nos principio. Esaki ta manera cu nos por mantene nos postura y tin un sentido di seguridad. Por ehempel, un persona cu ta sigur di su habilidad por uza su ego pa bira un lider inspirado.

Pero, ego tambe tin su parti negativo. Ora 'ego' bira demasiado grandi, e por crea un distancia entre nos mes y otro hende. Nificando, cu paso bo no ta reconoce e daño cu bo ego ta haci, ta pone bo ta un persona, cu bo no kier ta.

Esaki ta pasa ora nos ta pone nos mes como prioridad constantemente, sin considera e necesidadnan di otro. Ego ta regularmente un factor principal den conflicto y desunion. Ora nos no por reconoce cu otro hende tambe tin su balor y necesidad, ta haci cu nos relacionnan ta sufri. Pues pa motibo cu nos ego ta mucho halto, nos ta sinti nos mes ofendi pa loke otro hende ta bisa of haci, sin trata di compronde su punto di bista.

Un maneho sano di ego ta crucial pa desaroya relacionnan fuerte y un bida balansa. Pa logra esaki, nos mester practica humildad y reflexiona riba nos accionnan. Reconoce cu nos no sa tur cos of cu nos mester tin contesta pa tur cos. Reconoce cu bo por siña for di tur hende sin importa, edad, nacionalidad of genero. Alavez pidi despensa ora cu bo ego tawata demasiado of cu bo tawata robes. Tur esaki ta formanan di reconoce cu bo ta mehorando bo mes.

Poco poco cu nos logra balansa nos ego, nos ta logra un bida cu harmonia y respet pa nos mes y pa otro.

Skirbi pa Gillmar Werleman