Open Day di Maria College MAVO cu tema “Aruba un pais multicultural”

ORANJESTAD (AAN): Prome Minister Mike Eman a haci bishita na e Open Day di Maria College MAVO,

un actividad educativo organisa bou di e tema “Aruba un pais multicultural.” E evento tabata pa presenta un STREAM-fair, enfoca riba Science, Technology, Reading, Engineering & Economics, Arts y Mathematics, cu ta resalta e importancia di educacion multidisciplinario pa prepara hobennan pa futuro.

E STREAM-fair a brinda un plataforma unico pa estudiantenan di e scol presenta nan proyecto innovador den diferente area academico. Durante e actividad, bishitantenan a haya oportunidad pa aprecia diferente exposicion y demostracion interactivo, mientras cu tambe por a drenta den combersacion cu e estudiantenan riba nan idea, creatividad y aspiracion profesional.

Durante su bishita, Prome Minister Mike Eman a expresa su aprecio pa e iniciativa di Maria College MAVO pa stimula innovacion, creatividad y pensamento critico entre hobennan. Segun Premier Eman, educacion integral ta un di e pilarnan mas importante pa e desaroyo di Aruba como un pais multicultural cu ta prepara su generacionnan nobo pa enfrenta reto di un mundo moderno.

E actividad tambe a inclui presentacion di studiantenan, exposicion di diferente materia di e scol y un competencia di fitness como parti di e programa di e anochi. E Open Day a sirbi como un oportunidad pa comunidad conoce mas di cerca e trabou educativo cu ta tuma lugar den Maria College MAVO y e talento di e siguiente generacion di profesionalnan di Aruba.

E presencia di invitadonan y representantenan di comunidad a forma un estimulo importante pa estudiantenan y docentennan, resaltando e balor di educacion integral pa futuro di Aruba.