OIG ta aplaudi incentivonan fiscal nobo pa revitalisacion di Oranjestad

ORANJESTAD (AAN): Grupo di inversionista di Oranjestad (OIG/OBIZ) ta yama bonbini na e pakete di incentivo fiscal recientemente anuncia pa Gobierno di Aruba pa Oranjestad.

E incentivonan aki ta un stap grandi tan spera pa restaura bida, actividad, y orguyo den curason di e capital di Aruba.  

OIG kier reconoce y gradici Minister di Finansa, Asuntonan Economico y Sector Primario Geoffrey Wever, pa su liderazgo, persistencia, y vision cu el a demostra pa acelera revitalisacion di Oranjestad. Minister a mustra comprondemento amplio di kico centro di Oranjestad mester pa recupera y prospera.  

E framework di incentivanan nobo, cu lo drenta na vigor 1 di januari 2026, ta manda un señal cla na tur inversionista, doño di negoshi y propietarionan di edificio cu Oranjestad ta halto riba lista di prioridad di Gobierno di Aruba y cu nan ta mas cu comprometi pa trece bida bek den nos centro di ciudad.  

Liderazgo cu ta crea momentum 

Pa hopi aña, Oranjestad a confronta desafionan cu ta similar na otro ciudadnan historico rond di mundo: edificio bashi, propiedadnan decai, problematica di adicto ambulante, y projecto di desaroyo cu a keda para. Loke ta haci e biaha aki diferente, ta cu gobierno actual ta ataca atende of encarga e problema di un manera practico y cu vision pa futuro. 

E pakete di incentiva introduci tin instrumentonan concreto pa promove invercion priva, incluyendo:

• Un excepcion temporal di belasting riba ganashi y impuesto riba dividendo pa proyectonan cu ta cualifica; 

• Excepcion temporal di overdracht belasting y impuesto riba facturacion (BBO/AZV) durante e fase inicial di redevelop; 

• Posibilidad pa depreciacion flexibel di gasto di renobacion y redevelopment. 

Tur e incentivonan aki ta habri porta pa probecha di e oportunidad pa inverti den centro di Oranjestad. 

Segun OIG, esaki no ta djis un reahustacion fiscal — sino un paso strategico. 

“Loke nos ta mira aki ta liderazgo cu ta compronde e realidad di loke tin mester pa promove desaroyo di centro di ciudad,” segun un di e invercionistanan afilia cu OIG.

“Minister Wever a crea e condicionnan necesario pa invercionistanan por move cu confiansa. Esaki ta exactamente e tipo di gobernacion cu ta hacie posibel pa transforma planes den projecto real.”

Importante ta cu e gobierno aki no ta enfoca solamente riba actividad comercial, pero ta estimula desaroyo di uzo mixto — manera vivienda, cultura, creatividad y otro servicionan. Esaki ta alinea directamente cu e vision di OIG pa un centro di Oranjestad: un luga unda hende ta biba, traha, studia, y topa otro.

Un otro inversionista di OIG a agrega:

“E incentivanan aki ta mustra confiansa den e sector priva y confiansa den e potencial di Oranjestad. Nos ta aprecia e compromiso di e Minister pasobra renobacion di full un centro di ciudad  no ta pasa di un dia pa otro, pero e ta cuminsa cu desicionnan concreto.” 

Un compromiso comparti pa Oranjestad

OIG ta aplaudi e direccion cu  gobierno a tuma y ta spera cu por sigui cu e cooperacion cu tin entre OIG y Gobierno di Aruba y tur stakeholder relevante. Nos ta kere cu ora sector publico y iniciativa priva alinea, transformacion berdadero ta bira posibel.