Oficina di DUO ta habri pa dos siman principalmente pa yuda studiantenan cu ta atrasa cu nan pago

 Stans Baar, informador di DUO:

ORANJESTAD (AAN): Dienst Uitvoering Onderwijs (DUO) di Hulanda ta na Aruba pa un periodo di dos siman, caminda nan a habri un oficina di servicio temporal pa brinda sosten y guia tanto na ex-studiante como na futuro studiante. Segun Stans Baar, informador di e servicekantoor di DUO, e iniciativa tin como meta principal pa yuda esnan cu tin pregunta of situacion pendiente, specialmente den tema di atraso di pago y preparacion pa studia na Hulanda. 

Durante e periodo aki, ex-studiantenan cu tin un retraso chikito den nan pago ta wordo anima pa bishita e oficina pa haya guia necesario. DUO ta enfoca riba busca solucion hunto cu e studiante, mirando posibilidadnan pa ahusta e monto mensual segun e ingreso actual. Den algun caso, e pago mensual por wordo reduci of hasta bay na cero, dependiendo di e situacion financiero di e persona. 

Ademas, e oficina ta brinda informacion importante pa studiantenan cu tin plan pa bay studi na Hulanda. Baar a enfatisa cu e proseso ta hopi amplio y diferente, y bon preparacion ta esencial pa evita stress despues di yega na Hulanda. Entre e pasonan mas importante, studiantenan mester inscribi na un estudio via Studielink, despues solicita nan studiefinanciering na DUO. 

Ora esaki keda aproba, nan lo ricibi un burgerservicenummer (BSN), cu ta necesario pa aplica pa DigiD. Cu DigiD, studiantenan por regla hopi asunto oficial for di Aruba mes prome cu nan biahe. 

Tema di ingreso y impuesto tambe ta di gran importancia. Pa studiantenan cu ta solicita un beurs adicional, ta necesario pa presenta e ingreso di e ultimo dos añanan di nan mayornan. Pa ex-studiantenan, e informacion aki ta esencial pa determina si nan pago mensual por wordo ahusta. 

Actualmente, no tin un sistema automatico di intercambio di informacion cu e Departamento di Impuesto di Aruba, pero DUO ta trahando activamente riba e cooperacion aki. Mientras tanto, studiantenan mes mester presenta nan informacion di ingreso cada aña.

E oficina di DUO ta ubica na J.F.K. Education Center na Stadionweg, Oranjestad. Pa orario di apertura y mas informacion, interesadonan por bishita www.duo.nl/cariben.