Obra teatral “KINGS…come home” lo yega Aruba na september 2026

Despues di un gira exitoso na Hulanda

ORANJESTAD (AAN): Despues di un gira exitoso na Hulanda y cu 14 presentacion den e iconico Apollo Theater na New York, e obra teatral “KINGS…come home” finalmente lo yega Aruba na september 2026.

E obra di teatro “KINGS…come home” ta forma parti di e programa cultural en conexion cu 40 aña Status Aparte y 50 aña di Himno y Bandera. Den e aña di conmemoracion aki, caminda nos pais ta refleha riba su desaroyo politiko, historico y cultural, e obra ta contribui na un refleccion mas amplio riba pasado, identidad y futuro.

E ekipo creativo di “KINGS…come home” ta specialmente interesante paso e ta consisti di creatornan cu origen Arubiano y di Corsow, incluyendo e direccion teatral di Ira Kip y di canta-autor Arubiano Michael Lampe, cu a compone e musica pa e presentacion. Pa nan e presentacion na Aruba tin un significado special: e obra ta trata di busceda di bo cas, bo origen y memorianan. Treciendo e obra den e contexto Caribense, for di unda parti di e obra a nace, ta dunele un profundidad importante y ta agrega un capitulo nobo riba con e historia por wordo interpreta y sinti.

Cu su tematica tocando migracion, herencia y comunidad, “KINGS…come home” ta trece arte di tarima internacional den un dialogo directo cu e historia y e realidad cultural di Aruba. Asina e obra no ta solamente un produccion artistico, sino tambe un contribucion na e discusion tocante ken nos ta, di unda nos bin y unda nos ta bay.

E produccion ta un iniciativa di KIP Republic y na Aruba lo wordo presenta den colaboracion cu co-productor Cas di Cultura, cu pa un par di aña caba ta toca e tema di Aruba su herencia y di e epoca di sclavitud y colonial pa trece conocemento y concientisacion di nos pasado. E proyecto ta wordo haci posibel pa e Comite di Conmemoracion di Pasado di Sclavitud y Fonds Podiumkunsten.

E presentacion lo wordo interpreta den un variacion di idioma — Papiamento, Ingles, Hulandes, Tigrinya y Kikongo — caminda cada actor ta papia den su propio lenga materno.