“Nos ta mira cu comunidad ta desea y ta mira cu tin base pa un coalicion entre Partido AVP y Partido Futuro”

Wendrick Cicilia a reuni cu Gobernador:

*AVP a propone Rene Herde como Informado 

ORANJESTAD (AAN):  Wendrick Cicilia, candidato #1 riba lista di Partido AVP a reuni cu Gobernador Alfonso Boekhoudt diamars mainta y den cuadro di esaki el a duna di conoce cu e audiencia bay riba e proceso cu mester bay inicia.

            "E ta na su luga awe mainta pa mi por comparti palabranan di gratitud cu comunidad di Aruba den nomber di partido AVP, pero tambe den nomber di mi persona, pa e confiansa deposita den nos partido", el a expresa.

            El a agrega cu a reuni cu Gobernador cu un sentido hopi positivo. Nan ta interpreta e resultadonan di eleccion como uno hopi positivo. A discuti riba diferente topico manera resultado di eleccion, pero tambe e diferente posibilidadnan cu ta existi.

            Aworaki mester bay nombra un Informado cu ta bay inicia e discusionnan cu e partidonan pa explora e diferente posibilidadnan di gobernacion. "Di nos banda nos ta mira cu tin suficiente base di e resultadonan di eleccion di kico comunidad ta desea. Y nos ta mira cu comunidad ta desea y ta mira cu tin base pa un coalicion entre Partido AVP y Partido Futuro, cu ta esnan cu a sali cu un resultado hopi positivo for di e contienda electoral", Cicilia a bisa.

            Nan a comunica esaki na Gobernador y tambe cu den e proceso aki di informacion cu lo mester bay inicia, cu AVP ta di e pensamento cu nan ta sinti cu tin hopi oportunidad pa nan como e partido mas grandi den e contienda electoral. Cu tin e prerogativa pa presenta un candidato pa e posicion aki y nan a comunica cu nan lo desea di mira Rene Herde den e posicion di Informado, Wendrick Cicilia a indica.