No yama reunion pa papia riba Rijkswet ta violacion di reglanan di Parlamento

Otmar Oduber di PPA:

• Zsolt Szabó tambe ta haya esaki preocupante
• E kier sa si acaso tin cos pa sconde 

ORANJESTAD(AAN): Recientemente lider di PPA y parlamentario Otmar Oduber a papia riba su prome encuentro cu Secretario di Estado di Hulanda Zsolt Szabó.

“Tur hende por imagina cu durante e reunion aki e enfoke di partido PPA en todo caso tabata riba e Rijkswet y e discusionnan cu tin riba e interes di e prestamo cu Aruba tin pa loke ta e pandemia, pero tambe e otro debenan cu pais Aruba tin”.

   Durante  reunion aki nos tabata hopi categorico den nos preguntanan na e Secretario di Estado, mientras cu e contestanan bek na Parlamento no tabata categorico, segun Oduber.

   El a sigui bisa cu esaki ta algo preocupante.

Segun e lider di e partido Oranje, riba 15 di Januari a dirigi un carta pa presidente di Parlamento pa yama un reunion publico riba e Rijkswet y te ainda ningun reunion a wordo yama.

“E prome keho abierto cu nos ta haci ta cu bo ta mira cu apesar cu bo ta papia di un politica nobo, e reglamento di ordo di Parlamento ta papia di e hecho cu dentro di 30 dia mester yama un reunion na momento cu un miembro di Parlamento haya sosten pa yama un reunion publico y esaki no a tuma lugar ni bao di e ex presidente di Parlamento Gerlien Croes, ni bao di e nobo Marlon Sneek”.

“Nos a mustra riba e hecho cu tin un violacion di e propio reglanan di Parlamento y mi ta kere cu aki ta e caminda cu nos mester para keto, pasobra con nos kier tin respet di Hulanda, si nos no ta cumpli cu nos propio reglanan, corda pa nos por cumpli cu compromisonan cu nos haci cu Hulanda,: segun Oduber.

El a bisa tambe cu pa colmo Aruba ta tres siman leu di un fecha cu a wordo poni, pa loke ta trata e Rijkswet.

“Ora cu no tin transparencia, esey ta nifica cu tin cos pa sconde”, segun e lider di PPA.