No kier pa e proceso di forma gobierno dura demasiado largo, pero e tin cu tuma e tempo debido pa por garantisa stabilidad den gobernacion

Lider di Partido Futuro, Gerlien Croes a reuni cu Informador:

ORANJESTAD (AAN):  Lider di Partido Futuro, Gerlien Croes a reuni cu Informador, Sra. Tisa LaSorte diaranson mainta y el a laga sa cu esaki ta e proceso oficial y a papia hopi abierto riba locual ta e puntonan di salida pa partido Futuro.

            Croes a agrega cu locual ta keda importante pa Futuro ta e programa cu nan a presenta, e puntonan di salida y e puntonan di accion cu nan a delinea cu mester haya atencion na Aruba na e momento aki.

            El a anuncia cu a inicia combersacionnan cu otro partidonan. El a bisa cu democraticamente e prome partido yama ta partido AVP. Nan lo cuminsa explora a base di loke ta e parti di contenido pa wak con leu por yega.

            "Durante e proceso aki ora cu ta asina leu nos lo mester firma un declaracion di ta willing pa encamina e proceso necesario cu e partido. Prome cu esey lo haci un orientacion mas profundo cu e partido pa wak si nos por yega asina leu tambe", el a expresa.

            Gerlien Croes a enfatisa cu nan ta respeta e resultado di eleccion y cu nan ta dispuesto pa sinta cu tur partido. Cualkier partido cu Futuro ta den combersacion cu ne, mester tin e garantia cu den tur sentido por bay haci e trabao debido.

            "Aruba mester no solamente un bon gobernacion, pero tambe un manera diferente, nobo di goberna e pais aki. Mester por ta willing tambe di pensa diferente y haci cambionan pa locual ta e forma cu nos ta goberna", e lider di Futuro a declara.

            El a sigui bisa cu e programa cu partido Futuro a presenta ta detaya e realidad di Aruba y e pensamentonan dicon a corto y largo termino cu mester bay atende cu esakinan. E ta haya cu dificilmente algun partido por bisa cu nan no ta compatibel cu e pensamento di partido Futuro.

            Croes a indica e proceso aki no kier pa dura demasiado largo, pero e tin cu tuma e tempo debido pa por garantisa un stabilidad di un gobernacion. Na inicio di e proceso tur hende por ta den linea cu e programa, pero di experiencia por a wak cu coalicionnan cu a ser forma, na caminda ora di yega e momento di realisa, e no ta bay mesun 'smooth' manera cu e proceso a bay na un inicio. Tur hende ta pura pa goberna, el a declara.

            Banda di esaki el a enfatisa cu cualkier palabracion cu lo por tin, nan palabracion den gobernacion ta bay ta a base di un acuerdo caminda cu detayadamente ta bay acorda y ta bay pone otro responsabel pa locual no ta wordo haci y esey lo lidera e gobernacion tambe.

            El a remarca cu Aruba mester ta abierto pa un forma nobo di goberna y mester cuminsa pensa diferente tambe.