Negociacion cu Gerencia di Palm Beach Hotel a para y conduci na paro di labor Diabierna ultimo

Ryan Giel, Director di Negociacion (FTA):

ORANJESTAD (AAN) – Diabierna ultimo, dia 10 di Januari mainta, a tuma lugar un welga di trahadornan na Palm Beach Hotel. Señor Ryan Giel, director di negociacion di Federacion di Trahadornan di Aruba (FTA), tabata presente pa sostene e trahadornan, ya cu e sindicato a confronta cu e hecho cu nan a pega den e negociacion. Tin tres punto cardinal unda e trahadornan ta sinti cu e Gerencia ta faltando nan respet.

            Den entrevista cu DIARIO, Giel a comenta cu FTA tabata tey buscando tambe e derecho di e trahadornan. E tres puntonan cardinal ta 1.“Aworaki, loke nos ta pega cu ne ta cu nos a sinti cu e parti di bonus no ta wordo trata seriamente, nos a bin cu ne na mesa di negociacion y nan no a tuma e parti ey. Y despues, ora di pagamento di bonus nos a ripara cu esaki ta wordo paga sin evalua corectamente, si wordo evalua mes!” Ryan Giel a declara.

            El a señala cu akinan por wak e discrepancia cu nan a bin cu ne. 2: Sin lubida e negociacion di aumento di salario cu ta e di dos punto. “Nos a keda riba un punto cu nos ta kere cu ta husto, den sentido cu nos a busca cifranan cu tin di haber cu costo di bida, bestaansminimum, asina nos ta procesa nos cifranan cu nos ta pidi pa e miembronan, cu a keda wordo baha”. Nos a keda tuma nan. Punto 3. “Awo, loke tabata e final mes cu a pone nos para, ta cu e CAO cu ta vigente aworaki, a caduca na Juli aña pasa, y nos a pidi pa duna nos e aumento retroactivo y nan a nenga esey tambe”, Ryan Giel a duna di conoce.

Esaki ta e tres puntonan cardinal y FTA hunto cu e trahadornan a para pafo pa exigi respet.

            Giel a splica cu e protesta ta pa demostra cu nan tey, y a keda un rato te 10 or pafo, y despues a ta bay traha bek pendiente di un contesta di gerencia si tabata posible  pa si dia siguiente mes. “Y si no, despues di esey cos ta escala e ora ey. Mi persona a purba comunica cu e Gerencia di ayera nochi caba, y mi a wordo bisa cu si tin paro cos ta wordo bari for di riba mesa. Esey mi ta kere no tabata un bon contesta. E contesta mester ta bay sinta na mesa y caba cu esaki, cu tabata e manera mas corecto di informa noa”, Ryan Giel, director di negociacion di FTA, a conclui.