Na Aruba ainda falta mas profesional specialisa cu servicio disponibel y un sistema miho organiza y coordina

Carolina Span di Fundacion Autismo Aruba:

ORANJESTAD (AAN): Den luna di april, mundo henter ta pone enfasis riba conscientisacion di autismo, reconociendo cu cada persona tin su propio forma unico di bria. E momento aki ta invita nos pa mira mas leu di limitacionnan y aprecia e forsa, creatividad y balor cu personanan cu autismo ta aporta na sociedad. Na Aruba, e compromiso aki ta refleha den esfuerso continuo di organizacionnan cu ta traha pa crea un comunidad unda inclusion no ta palabra so, pero un practica den nos bida diario.

   Señora Carolina Span di Fundacion Autismo Aruba (FAA), den un entrevista recien cu DIARIO riba e tema di Dia Mundial di Conscientisacion di Autismo, a indica cu durante e ultimo añanan, FAA a fortalece su colaboracion cu Fundacion Nacional di Autismo, hunto cu diferente profesional di sector di cuido, educacion y trabao social.

   Segun e, tur e instancianan y organizacionnan involucra ta reconoce cu ainda tin un falta significativo pa ayudo y diagnostico na Aruba. E situacion aki, segun Span, ta directamente conecta cu e nivel di conscientisacion den comunidad, cu ta encurasha hende pa busca y haya e sosten cu nan mester.

   No obstante, e realidad actual ta mustra cu, como pais, e capacidad di e servicionan existente ainda no ta suficiente pa cubri tur e necesidadnan. Aruba tin mester di mas profesional specialisa, mas servicio disponibel y un sistema mas organiza y coordina. E preocupacionnan aki ta wordo presenta regularmente den rapportnan di FAA na Gobierno, como parti di nan esfuerso pa logra un miho structura di cuido y sosten pa personanan cu autismo y nan famia.