Na 1985 un lucha nacional a perde un bataya politico!

Recuperacion financiero na 2024 directamente mara na Status Aparte

• Prome cu Status Aparte placa di Aruba no tabata solamente pa Aruba
• Betico Croes a percura pa maneho propio di pensioen di behez 

ORANJESTAD (AAN) E Florin di Aruba y e Banco Central di Aruba na 2024 a bira e prueba mas grandi di e motibo legitimo di lucha di e Arubiano pa su Status Aparte den Reino Hulandes.

Ta hustamente e forma cu Gobierno Evelyn Wever-Croes a logra comberti e situacion financiero y monetario di Aruba den un maneho sano di placa di Pueblo di Aruba, ta exigi pa awe tur Arubiano cu a nace despues di 1986 y tin edad pa ricibi educacion basico, ta na haltura di e realidad di historia di Aruba pa asina nan por hiba un lucha legitimo pa e pais.

Uno di e problemanan serio cu Aruba tabata tin teritorio insular den seno di Antia Hulandes, tabata e forma cu e placa di Aruba no tabata wordo uza directamente pa bienestar di e Arubiano.

Con esaki tabata posibel ta hiba na e base di e gobernacion central di Antia Hulandes, caminda Aruba directamente tabata tin un posicion cu tabata exigi aporte di placa di Aruba pa e funciona pero na mes momento no tabata duna Aruba e posibilidad pa bringa pa e derechonan di e Arubano a base di su participacion den e Parlamento di Antia.

Esaki tabata e punto central di e lucha di Betico Croes, cu no a tene su mes na separacion di e islanan sin mas, pero na un Status Aparte cu un base fuerte cu tabata evita abuso directo contra e Pueblo di Aruba.

Awe Gobierno Evelyn Wever-Croes a entrega Aruba e prueba di loke Aruba a alcansa na 1986, ora e lucha nacional di Betico Croes a entrega Aruba e Status Aparte cu a haci cu e placa di Aruba tabata sirbi e Arubiano.

Prome cu realizacion di Status Aparte, placa di belasting di e Arubiano tabata sirbi como parti di e entrada di gobernacion di Antia den un tempo cu Lago entre otro a percura pa bon entrada di Aruba mescos cu e cantidad di negoshinan Arubano, cu tabata duna trabou na e trahador Arubano cu tabata comparti su entrada cu henter Antia Hulandes.

Kico esaki tabata nifica a bini dilanti den e hecho cu ora tabata negosha Status Aparte di Aruba, mester a atende cu e exigencia pa Aruba sigui duna sosten financiero na e islanan chikito a base di e Fondo di Solidaridad.]

E lucha di Betico Croes a exigi un moneda y un Banco Central propio pa Aruba pa evita cu no ta Aruba pero henter Antia lo a sigui maneha placa di Aruba a base di un moneda cu lo no tabata di Aruba.

Pa Aruba por a wordo forza na entrega su placa na Antia Hulandes tabata basa riba e hecho cu gobernantenan di AVP den pasado a bay di acuerdo pa kibra e paridad di Aruba y Curacao den Parlamento di Antia y duna Curacao un mayoria absoluto di 12 asiento den Parlamento di Antia, caminda Aruba y e otro islanan hunto, nunca por a defende nan causa den Parlamento di Antia y evita cu placa di Aruba mester a wordo comparti cu henter Antia cu e tempo un Gobernacion costoso di Antia y un gobernacion encarga solamente cu asuntonan domestico di Aruba.

E lucha di Status Aparte di Betico Croes a haci cu Aruba por a haya su propio moneda, su propio SVB pa dicidi kico ta pasa cu asuntonan social basico di Aruba.

Na 1985 wega politico cu ciere di Lago cu tabata parti di un crisis internacional cu a cera cantidad di refineria na mundo incluso e refineria di Curacao cu tabata Shell, lo tabata pa motibo di Betico Croes, y e necesidad pa resto di Aruba a yuda e Arubianonan cu a keda den necesidad pa medio di belasting, a wordo uza pa kibra Betico Croes, cu nunca a mira logro di su lucha cu ta haci cu awe Gobierno Wever-Croes por a evita caida financiero total di Aruba a base di e maneho abusivo di Gobierno Mike Eman.

Ta importante pa apunta cu tabata Betico cu a percura cu Aruba a keda cu su propio SVB y fondonan cu mester atende cu e bienestar social di henter poblacion.

Na 1985 a kibra Betico y a cera porta pa historia di Aruba basa riba berdad, cu a permiti silencia e abusonan mas grandi cu a wordo comete contra Pueblo di Aruba.