Mucha di 9 aña a hoga na Mangel Halto

ORANJESTAD (AAN): Riba un Diadomingo cu hopi hende ta bay beach pa disfruta un rato ameno cu nan famia, den un cera di wowo, esaki a bira un pesadiya.

Segun informacionnan di Cuerpo Policial, Diadomingo atardi despues di 5'or central di polis a haya un melding relaciona cu un incidente, na unda un mucha homber a haya problema den lama na Mangel Halto y no ta reacciona. E prome informacionnan tabata cu ta trata di un mucha di 7 aña di edad.

Polis a yega net na momento cu nan a trece e mucha homber na canto y na unda polis di biaha a bay over na reanima e mucha, wardando yegada di ambulance.

Ambulance a yega na e sitio y ta tuma over y ta sigui na traha di yuda e hobencito. Nan a transporte cu maximo urgencia pa hospital pero lamentablemente pa 6:40, dokter a constata morto di e mucha homber fam E. naci 11-3-2015 di apenas 9 aña di edad. 

DIARIO ta manda palabra di profundo condolencia y forsa na famia di e fayecido.