Momento historico pa Aruba y pa veld di enseñansa

Minister Gerlien Croes encuanto aumento salarionan:

ORANJESTAD (AAN): Diabierna mainta den un momento historico pa pais Aruba y specialmente nos maestronan, Gabinete AVP-Futuro y sindicatonan Simar, Seppa y TOPA a firma un declaracion di intencion y compromiso pa fase 1 di restructuracion salarial di maestro.

   E declaracion aki ta worde firma despues di 7 luna intensivo caminda bao di auspicio di Minister di Educacion, Minister Gerlien Croes, a haci diferente investigacion y calculacion di scenarionan hunto cu Departamento di Enseñansa, DUOS y DRH cu rondanan consultativo cu Directie Financien y den dialogo cu sindicatonan.

   Cambionan: E proposicion aproba pa conseho di minister ta encera:

(*) 'Gelijktrekking' di salario di maestro di scol primario (schaal D13) pa schaal D34 cu ta schaal di docente di scol secundario cuminsando desde 1 di januari 2026.

(*) Harmonisacion di toelagen di 'schoolleiders' caminda cu toelagen di tur 'schoolleiders' lo bira 25% y lo worde incorpora den nan pensioen.

(*) Trayecto acelera di 'gelijktrekking' di salario di maestronan cu lo baha cu pensioen dentro di 3 aña, pa asina nan por haya e 'gelijktrekking' of subida salarial prome cu nan baha cu pensioen.

(*) Ahustacion di salario di e salario di tur persona cu ta den un 'docentenschaal' cu 1 periodiek mas halto desde 1 di januari 2026.

   Den fase 2 cu tambe a worde acorda pa conseho di minister lo traha riba simplifica e structura salarial di maestronan, traha riba un maneho di compensacion pa maestronan por medio di profesionalisacion continuo, sondeo riba uzo di edad maximo pa crece den salario, gelijktrekking entre BRA-schaal y Docentenschaal por medio di un schaal nobo pa klassenassisten.

   Tin cu indica cu klassenassistenten cu ta den un 'docentenschaal' actualmente tambe lo conoce un adelanto salarial. Ta trata aki di mas of menos 98 klassenassistenten cu lo haya e ahuste aki. Pa por sigui cu fase 2, e investigacionnan ta tumando luga actualmente. Den e investigacion aki ta tene cuenta cu grandura di klas, formanan pa reinforsa structura di cuido pa studiante y maestro, professionalisacion di maestro como tambe e posibilidad di introduci modelonan pedagogico-didactico alinea na e necesidadnan di siglo 21.

   E mehoramento di calidad di enseñansa y trece innovacion den enseñansa ta forma parti di un plan strategico y holistico pa mehora cada sistema cu ta forma parti di e sistema di enseñansa den su totalidad. E restructuracion salarial di maestronan ta forma parti di un di areanan identifica pa asina por yega mas serca di e mehoracion di e sistema den su totalidad. Tur esaki lo worde formalisa cu aprobracion di Presupuesto 2026.

   Pa mas di 30 aña, mester subraya cu e fase 1 di e restructuracion salarial den e forma aki ta tuma luga pa prome biaha den historia di enseñansa riba nos isla. Cu e prome paso aki minister Gerlien Croes ta gradici tur maestro pa nan esfuerso durante añanan den formacion di nos pais. 'Boso esfuerso ta fundeshi y e alma di progreso y desaroyo di nos Pais'.  Na final Ministro Croes a duna danki na tur cu a yuda.