Ministro mustrando sosten na e campaña ‘Biba cu Epilepsia’ di Fundacion Epilepsia Aruba

Mervin Wyatt-Ras:

ORANJESTAD (AAN)-- En conexion cu conmemoracion di Dia Mundial di Epilepsia, cu ta riba Diamars 10 di Februari aki, Fundacion Epilepsia Aruba tabata invita den e Programa Nos Mainta, di Tele Aruba, conduci pa Siomara Everon y Ivan Kelie Jr., pa elabora riba nan campaña informativo yama: “Biba cu Epilepsia”, pa pueblo ta bon informa.

   Minister di Salud Publico, señora Mervin Wyatt-Ras, tambe tabata presente y a expresa cu pa su persona ta un honor di ta presente hunto cu e fundacion den e programa.

   El a expresa cu e ta hopi contento cu e iniciativa aki pa duna informacion y concientiza nos pueblo encuanto un condicion manera Epilepsia.

   “E ta di suma importancia concientiza nos pueblo, pasobra nos ta para tambe pa inclusion y pa tur hende tin e derecho igual, kiermen ta masha importante pa ora un persona manifesta Epilepsia, cu e  haya opvang, y tambe respet cu e ta parti di dje, y cu no ta un forma di conden’e como persona, cu e ta haya un stigma.

   Esey mi ta para p’e no solamente como Minister di Salud, sino tambe como Minister di Asunto Social, cu mester duna pueblo tur sorto di informacion manera e Fundacion ta haci, p’asina pueblo ta conciente y sa kico pa haci, y tambe cu personanan cu ta epileptico of cu tin biaha ta haya e signonan of atakenan aki, tambe ta parti di comunidad y tambe di un famia, y cu nos tin cu siña anda cu nan, y duna nan e atencion. Y, na momento cu esaki sosode ta prepara pa sa kico pa haci. Pasobra por ta e pashent ta spanta hende na e momento ey, cu e por hurt su mes ora cu e ta cay.

   Mi a yega di mira un caso parcialmente, y e ta spanta bo, bo no sa kico pa haci, pero door di duna informacion bo ta kita tur e cosnan cu por hacie daño, laga e persona sintie sigur y keda trankilo. Esey ta e  punto number un, cu bo mester keda trankilo y haci posibel cu e persona sinti su mes miho. Ami ta apoya e campaña aki, atravez di e programa aki cu hopi hende ta mira, cu ta hopi gusta den nos comunidad, y bo ta haya e ora ey cu nos pueblo sa na momento cu algo asina pasa, kizas por sa kico pa haci, Minister Wyatt-Ras a reitera.

   El reitera tambe cu gobierno ta apoya e iniciativanan aki, p’asina mehora e salud di nos ciudadanonan, y hisa tambe e calidad di bida di e personanan cu ta sufri di un of otro dificultad.