Ministro Geoffrey Wever stimulando tur esnan creativo pa workshop ‘Creatives Without Borders’

ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, ta invita esnan activo den e sector creativo of esnan cu

ta interesa den cuminsa den e sector creativo pa inscribi na e workshop cu Departamento di Asunto Economico, Comercio y Industria (DEZHI) via nan departamento Expro Desk.

   E workshop di tres dia, lo tuma luga 15, 16 y 17 di April y ta yama “Creatives Without Borders: Turning Creativity into Export Opportunities”. E meta di e workshop aki ta pa stimula y sostene e industria creativo y ekipa esnan cu ta participa cu conocimiento y skills pa por desaroya nan mes y nan negoshi na Aruba, y pa exporta pa mercado internacional.

   Durante e workshop, participantenan lo descubri con nan talento por genera ingreso den exterior, con posiciona nan trabao y negoshi pa mercado internacional y con converti creatividad den oportunidad real. Tambe lo haya informacion practico riba con pa proteha nan trabao y con pa traha profesionalmente cu clientenan internacional. E iniciativa aki ta mustra cu creatividad no tin frontera... y cu talento local, maske con chikito of grandi bo negoshi ta, tin e potencial pa sigui hiba Aruba riba mapa internacional.

   Aña pasa, Gobierno di Aruba a sigura un financiamento di USD 151.200 di Hulanda via e Tijdelijke Werkorganizatie (TWO) pa desaroyo integral di un maneho pa un Industria Creativo en Cultural (CCI), cu lo inclui un vision strategico, un plan di accion y un pakete di incentivo. E Orange Economy, ta un sector prometedor cu gran potencial economico y cultural, y  ta ocupa un lugar central den e strategia economico di Aruba pa Gabinete AVP-Futuro.
   Gobierno di Aruba continuamente ta demonstra e importancia di e e sector creativo cu stapnan concreto. Incluyendo, dos incentivo fiscal nobo cu a drenta den vigor Januari 2026. Cual ta e Starters Regeling y e incentivo fiscal pa stimula mas actividad den e FreeZone. E sector creativo, of  “Orange Economy”, ta inclui den tur dos di e incentivo fiscalnan aki cu e obhetivo pa stimula e sector, y asina sigui diversifica nos economia y traha mas cupo di trabao pa nos comunidad.
   Minister Wever ta gradici DEZHI y Expro Desk pa nan esfuerso y compromiso continuo cu e desaroyo di e Orange Economy y ta encurasha tur esnan interesa pa participa den e workshop pa informa, desaroya, y forma parti di e crecemento di e sector creativo  na Aruba. Participacion den e workship ta gratis, pero luga ta limita, pues, no laga e oportunidad pasa.