Ministro Geoffrey Wever a cende e pagara historico den centro di Playa

ORANJESTAD (AAN): Ministro Geoffrey Wever a haya e honor, pa uza un mecha y cende loke ta wordo describi un ‘Pagara Historico’ di Diaranson, Bispo di Aña Nobo, na Oranjestad.

   Esaki tabata durante un actividad di ‘Ban Bek Caya’ den dia, unda e tiendanan ta conecta hunto pa trece un Pagara Historico.

   E actividadnan aki a uni Caya Betico Croes, cu Columbusstraat, Wilhelminastraat, y tambe Plaza Daniel Leo.

   Alrededor di 2:00 pm, Ministro Geoffrey Wever den presencia di Prome Ministro Mike Eman, Ministro Gerlien Croes, Ministro Wendrick Cicilia, y Ministro Mervin Wyatt-Ras tabata den Wilhelminastraat hunto cu algun miembro di Parlamento pa presencia esaki.

   Tabatin varios turista tambe den e area cu a bay admira con e Pagara tabata tira y desinfecta tur e area cu su huma.