Minister Wever tampoco tin sentido di urgencia riba e topico di impacto di guera na Medio Oriente

Parlamentario Evelyn Wever-Croes

ORANJESTAD (AAN): Fraccion di MEP den varios ocacion a pidi pa Minister di Finansa, Asuntonan Economico y Sector Primario, Geoffrey Wever pa presenta na Parlamento den reunion publico pa toca temanan di hopi urgencia, entre otro di finansa, economia, diversificacion di economia, crisis economico mundial. Sinembargo, e minister no ta acudi na Parlamento pa duna cuenta. 

Parlamentario Evelyn Wever-Croes, den conferencia di prensa semanal di Fraccion di MEP a expresa cu e minister en cuestion ta haci cosnan cu ta incomprendibel pa Parlamento. Segun e parlamentario, e minister ta scoge ki dia e ta bay Parlamento, kico e ta bay haci Parlamento, y con hopi e ta bay papia. Mientras cu Fraccion di MEP a haci un cantidad di peticion na e minister pa e presenta na Parlamento, e minister no a bay na niun pero siman pasa si el a presenta den Parlamento pa un reunion riba un punto cu e mes a pidi.  

Fraccion di MEP ta pendiente riba un reunion riba e impacto di e crisis di e guera di Medio Oriente. Tanto Corsou y Sint Maarten a trata e tema aki y informa publicamente di e impacto cu e crisis aki tin riba e islanan. Mientras cu na Aruba, e minister concerni a indica cu ainda e ta haciendo estudionan y ainda falta hopi, y ora e caba cu e estudionan aki, el a presenta na Parlamento pa duna informacion, mientras cu e no ta na Aruba actualmente. 

Segun Parlamentario Wever-Croes: “Pa dia cu bo caba cu e estudionan ey, e guera a cambia y bo mester haci otro estudio”. 

E parlamentario a enfatisa cu riba e topico aki tambe e ta haya falta di e sentido di urgencia di Gabinete AVP – Futuro y di Minister Wever en particular cu tambe ta scoge kico e kier y ora cu e kier. “Ami no ta mira pakico el a biaha pa presta placa afo siendo cu nos tin surplus”, el a expresa. 

El a remarca cu ex minister di su Gabinete, Xiomara Maduro e tempo ey a regla fiansanan, no cu tanto biahamento pero confiando esnan cu tabata traha cu ne. Ademas, el a menciona, awo tin un miho rating y mester haci menos esfuerso pa haya placa presta na interes abou. 

“Kico tur e minister ta bay haci ta desconoci pa nos. Nos sa cu e ta bay haci un tour na henter Europa, siendo cu aki na Aruba e urgencia ta e costo di bida di nos ciudadanonan y e efecto di e guera cu ta bin. Pero di esakinan nos no ta tende e minister papia”, Parlamentario Wever-Croes a expresa.