“Minister Wever a yama un reunion den Parlamento cu na mi concepto no tin validez”

Segun Parlamentario Edgard Vrolijk:

ORANJESTAD (AAN)-- Parlamentario mr. Edgard Vrolijk, di fraccion di Partido Movimento Electoral di Pueblo (MEP), den entrevista cu Matutino DIARIO, a haci referencia na e reunion den Parlamento, cu Minister Geoffrey Wever a pidi, relaciona cu e maneho financiero na Aruba.

Un reunion cu el a pidi na Presidente di Parlamento, ken a pon’e Diabierna, den pura, segun mr.Vrolijk a indica. “Y seguramente, den mi concepto, un reunion cu no tabata tin validez algun, mirando cu ta proyectonan cu ta bin canando desde 2022 te 2025, y naturalmente, ta proyectonan den vispera di 2027, y cu mester keda cla. Nan ta e Landspakketnan y cu ta caduca e aña ey. Nan ta practicamente, proyectonan cu ta den finalizacion  di proyectonan cu a anda caba cu ex-Minister Xiomara, y cu naturalmente, ta yegando su fin, unda e (Minister Wever)  tin e responsabilidad di e 5% di e trabao cu falta” , Parlamentario Wever a señala.

Parlamentario Edgard Vrolijk a sigui bisa cu, naturalmente, fraccion di MEP a haci uso di nan deber como Parlamentarionan, mirando cu nan no ta haya reunionnan. “Nos a pidi reunion, por ehemplo, riba e topico di FMSA (Fuel Marketing & Supply Aruba), mirando loke ta pasando eynan, pa locual ta e compania cu mester a gana e bidding cu no a sigui. Nos a papia tambe riba e mocionnan cu nos a pasa akiden, pa busca un opcion pa e refineria  y asina tambe nos a pidi un reunion cu nos a pidi varios luna atras, pa locual ta e situacion geopolitico, y den esaki pakico nos urgencia”, Edgard Vrolijk a señala.

E Parlamentario a comenta cu Aruba tin un gobierno cu ya ta bay haci un aña, y tin hende cu ta bisa cu Fraccion di MEP ta critica. “Pero nos no ta critica, nos ta sigui locual ta poni den e acuerdo di gobernacion, por ehemplo den pagina 19 cu a trata locual cu nan den e Gobierno AVP-Futuro su programa, ta para bon cla cu nan lo baha costo di bida, nan lo percura pa un sistema moderno unda pueblo lo haya mas placa den su saco, y nos ta bay un aña cu nos no ta wak esaki. Nos ta wak un aña cu prijsnan ta aumentando completamente fo’i sla, cu solamente nos grandinan a haya un aumento, pero finalizacion di e poblacion aki e ultimo aumento cu e pueblo aki a haya un mehoracion, tabata e bahada di loon y inkomstenbelasting, cu ex-minister Xiomara Maduro a laga atras y a percura pa esaki wordo implementa”, Parlamentario Edgard Vrolijk a remarca.

El a subraya cu e ambtenaarnan a haya 11,7%, pero na final di dia, e pueblo den en general no a sinti e diferencia den e gobierno actual. “Al contrario, tur prijs a subi: gas, cuminda prijs ta subiendo, pero mas importante ta cu diabierna cu a pasa, e minister actual a priminti nos cu e siman aki lo bin bek cu su plan di contingencia pa locual cu ta e problemanan geopolitico. Nos a wak Curacao, Sint Maarten, ya nan a tuma accion, na Hulanda prijs a aumenta, cierto subsidionan ta ser duna, pero na Aruba nos no ta tende nada, y pa nos sorpresa nos a wak den prensa cu e minister a lanta bay”, Parlamentario Vrolijk a acentua.