Minister Ursell Arends ta condena venenamento di mascotanan inocente

ORANJESTAD (AAN):  Minister Ursell Arends, como Minister encarga cu bienestar di animalnan ta condena rotundamente e acto cruel di venenamento di mascotanan inocente den nos comunidad.

            "Nos ta expresa nos indignacion y tristesa profundo pa e accion cruel aki. E tipo di maltrato aki ta contra di tur principio di compasion y respet cu nos mester tin pa nos animalnan.

            Ademas, e ta causa sufrimento no solamente pa e animalnan mes, pero tambe pa e famianan cu ta considera nan mascotanan como parti di famia. Cacho y otro bestia no por defende nan mes y ta depende di nos, e ser humano, pa trata nan cu amor y bondad. 

            Na luga di haci daño, nos por busca otro manera pa trata cu cacho cu ta keda riba caya, trata nan cu respet y busca solucion nan cu ta respeta nan bida. E venenamento di animalnan inocente no ta soluciona absolutamente nada; contrario, e ta trece tristesa y dolor den nos comunidad. 

            Raporta cualkier actividad sospechoso na autoridadnan, pa nan por tuma e medida necesario pa stop e tipo di acto ilegal aki. Nos comunidad por bira un luga mas sigur y amoroso, unda cada ser bibo, incluyendo nos animalnan, por biba sin temor y cu dignidad. 

            Compasion y union lo permiti nos pa construi un pais mas husto", e mandatario a declara.