Minister Plenipotenciario ta un paso necesario pa proteha autonomia di Aruba

Parlamentario Eduard Pieters (PPA):

ORANJESTAD (AAN): Aruba tin un Ministro Plenipotenciario atrobe na Hulanda. Segun parlamentario Eduard Pieters di fraccion PPA, e paso aki no ta solamente un nombracion administrativo. Ta un asunto constitucional cu ta toca directamente posicion di Aruba dentro di Reino Hulandes.

   E rol di minister plenipotenciario ta stipula den Statuto di Reino (Statuut voor het Koninkrijk der Nederlanden), unda cada pais autonomo dentro di Reino mester tin su representante na Den Haag. “E minister plenipotenciario ta participa den Rijksministerraad, e conseho unda ta discuti y tuma e decisionnan di Reino.

   E funcion aki ta crucial paso, e ta representa Aruba den e decisionnan di Reino, e ta facilita dialogo diplomatico entre Aruba y Hulanda y e ta proteha interes di Aruba den e asuntonan constitucional, financiero y politico. Pa fraccion di PPA, esaki tabata un punto fundamental desde principio. Pieters a enfatisa cu Aruba no por keda sin un bos oficial na Den Haag y gobierno no por keda comete e eror aki,” Eduard a enfatisa.

   Un debate politico cu a tuma demasiado tempo: Segun Pieters, e nombracion aki ta yega despues di presion politico y un discusion prolonga entre e partidonan di gobierno AVP y Futuro. Den pasado reciente, algun lider politico a expresa cu no tabatin mester di un minister plenipotenciario y cu e funcion aki ta costa demasiado placa pa pais Aruba.

   Sinembargo, e decision di diaranson ta mustra cu finalmente a haya un formula pa restablece e posicion. “Pa PPA, esaki ta confirma loke fraccion a defende desde principio: Aruba no por ignora e responsabilidad constitucional, cu ta bin cu su status di pais autonomo”.

   Pieters a expresa confianza den e capacidad di señora Milly Schwengle. Señora Schwengle ta un persona cu a traha pa basta aña den Raad van State, un institucion central den sistema huridico di Reino Hulandes. Segun Eduard: “E experiencia aki ta duna un bentaha importante: conocemento profundo di e procedimentonan constitucional, experiencia den cultura politico di Den Haag y comprension di e relacionnan entre e paisnan den Reino”. Den un momento, unda Aruba ta celebra 40 aña di Status Aparte, Pieters ta enfatisa cu e representante na Den Haag mester ta preparado pa defende autonomia di Aruba cu firmeza.

    “Pa fraccion di PPA, e nombracion di un minister plenipotenciario ta mas cu algo simbolico. Ta un instrumento pa proteha nos principio fundamental: Aruba como pais autonomo dentro di Reino Hulandes. E representante den Den Haag tin un rol esencial ora tin discusion riba: cooperacion financiero, legislacion di Reino y relacion diplomatico entre e paisnan”.

   Segun Pieters, Aruba mester tin un bos fuerte pa defende su autodeterminacion y autonomia, manera e Staatsregeling di Aruba ta stipula.

   Finalmente fraccion di PPA ta desea señora Milly Schwengle hopi sabiduria y exito den e funcion importante aki. “Aruba mester un representante cu ta defende interes di pais cu dignidad y conocimiento. Pero e episodio politico cu a precede e nombracion tambe ta lanta hopi pregunta serio riba direccion di gobernacion. Un pais no por cambia posicion constantemente riba asunto asina fundamental,” Eduard a expresa.