Minister plenipotenciario ta e bos oficial di Aruba na Den Haag

Parlamentario di AVP, Jennifer Arends-Reyes:

ORANJESTAD (AAN): Parlamentario di fraccion AVP, Jennifer Arends-Reyes, a destaca importancia di e rol di Minister Plenipotenciario di Aruba como un puesto clave den representacion di Aruba dentro di Reino Hulandes. Segun Arends-Reyes, e funcion aki tin un balor strategico, pasobra e minister plenipotenciario ta e bos oficial di Aruba na Den Haag, unda e paisnan di Reino ta mantene dialogo constante riba diferente tema di gobernacion, cooperacion y desaroyo.

Arends-Reyes a splica cu e minister plenipotenciario ta cumpli un rol fundamental den mantene y fortalece e relacion entre Aruba y e otro paisnan dentro di Reino. E representante di Aruba ta participa activamente den reunionnan importante di consulta y cooperacion, manera e reunionnan di Conseho di Minister di Reino (Rijksministerraad).

Den e reunionnan aki ta discuti tema di gran relevancia pa futuro di e paisnan dentro di Reino, incluyendo cooperacion economico, gobernacion, siguridad y desaroyo social.

“Pa Aruba ta di gran importancia cu nos tin un representacion profesional y comprometi na Den Haag. E minister plenipotenciario ta e brug entre Aruba y e institucionnan di Reino, y e ta contribui pa percura cu e interesnan di nos pueblo ta wordo representa y defendi na nivel di Reino,” Arends-Reyes a indica.

Den e mesun contexto, Arends-Reyes a tuma e oportunidad pa felicita Milly Schwengle cu su nombramento como Minister Plenipotenciario di Aruba. Segun e parlamentario, e puesto aki ta bin cu gran responsabilidad, pero tambe cu un oportunidad importante pa contribui na fortalecemento di posicion di Aruba dentro di Reino.

“Mi kier felicita Sra. Schwengle cu su nombramento y desea e hopi exito den e tarea importante aki. Representa Aruba den Reino ta un gran honor. Mi tin confianza cu, cu su experiencia, dedicacion y conocemento, e lo sigui traha pa promove e interesnan di nos pais y fortalece e cooperacion dentro di Reino,” Arends-Reyes a conclui.