Minister Geoffrey Wever y Comision Pro Cunukeronan Arubiano ta firma un MoU pa fortifica sector primario y impulsa seguridad alimenticio

ORANJESTAD (AAN): Comision Pro Cunukeronan Arubiano (CPCA), bou liderzgo di Sr. Jair Britten y Minister di Finansa, Asuntonan Economico y Sector Primario, mr. Geoffrey Wever,

a firma oficialmente un Memorandum of Understandiing (MoU), marcando un paso importante pa fortalece e sector di agricultura y cria di bestia tradicional na Aruba.

   E MoU ta formalisa e colaboracion cu a inicia durante e reunion constructivo na november ultimo, ora cu e comision a presenta e desafionan urgente cu ta stroba e crecemento y profesionalisacion di e sector, y e acuerdo nobo ta establece un aliansa structural entre gobierno y e actornan principal di nos agricultura tradicional pa traha riba accion concreto y resultado real cu ta contribui na un Aruba mas fuerte, resiliente y duradero.

   Durante e intercambio anterior, e comision a presenta un lista amplio di obstaculonan structural, incluyendo entre otro e gasto halto y acceso limita na awa, e presion persistente di importacion barata cu ta pone desbentaha riba productonan produci local, e gasto eleva pa cuminda di bestia, e falta di sosten tecnico pa prepara cunucu, problema di brote di enfermedad di bestia, nesecidad critico pa renobacion genetico y e daño constante causa pa di cachonan di caya. E MoU ta confirma cu gobierno y e Comision lo traha hunto pa implementa solucion cu impacto directo, cubriendo entre otro e promocion di un acceso structural y pagabel na awa pa agricultornan y criadonan, e bahamento di derechonan di importacion pa cuminda di bestia, e fortificacion di sosten tecnico y operacionnan di DLVV, e mehoracion di salud di bestia y acceso na remedi, e implementacion di pruebanan pa renobacion genetico y preparacion pa compra di genetica nobo den 2026, e creaccion di un punto central di benta pa producto local y pa trata e problema di cachonan di caya manera un prioridad nacional.

  Durante e acto di firmamento, Minister Wever a enfatisa cu e MoU ta un paso importante den e transicion strategico di Aruba pa un sector primario moderno y robusto. Minister Wever a declara cu e reunion di november a duna claridad riba unda e problema ta, y cu e firmamento di e MoU ta move e proceso pa un fase di compromisonan formal y accion concreto. E acuerdo aki ta un instrumento pa implementa solucionnan real pa e sector, pa fortalece siguridad alimenticio y pa honra e rol vital di nos cunukeronan den sostene Aruba.” Minister Wever a reafirma cu e Ministerio ta compromete pa colabora estrechamente cu e comision y partnernan relevante pa logra resultadonan concreto, den linea cu e meta di e Programa di Gobernacion AVP–Futuro 2025–2028.

   E firmamento di e MoU ta consolida tambe un compromiso mutuo pa fortifica e base di agricultura tradicional di Aruba. Segun Minister Wever, “Nos cunukeronan ta un parti esencial di seguridad alimenticio y independencia di Aruba. E acuerdo di awe ta pone fundeshi pa un cooperacion mas fuerte y structural, orienta riba futuro.” E comision, representa pa presidente Jair Britten y su directiva, a expresa su reconocemiento pa e formalisacion di un aliansa cu lo yuda eleva e sector y amplia e bos di agricultornan den formulacion di politica nacional.

   Cu e MoU firma, Aruba ta pasa pa un fase nobo di colaboracion, transparencia y accion structural den maneho di e sector primario. Minister Wever y e comision lo sigui traha riba fortificacion di produccion local, impulsa siguridad alimenticio y preservacion di un parti vital di nos identidad y resiliencia nacional.