Minister Geoffrey Wever a reuni cu accionista di FreeZone Aruba NV

*2026 atrobe lo tin ganashi pa Freezone Aruba NV

ORANJESTAD (AAN): Diahuebs, Minister Geoffrey Wever, cu como Minister di Finansa, Asunto Economico y Sector Primario ta representa Land Aruba como unico accionista den FreeZone Aruba NV, tawata tin un reunion di accionista hunto cu e Director nobo di FreeZone Aruba NV, Sr. Walter Mosher, y e Supervisory Board di FreeZone Aruba NV pa presenta y acorda oficialmente e presupuesto pa 2026.

Durante e ultimo aña, FreeZone Aruba NV a pasa dor di un reorganisacion profundo. Entre otro:

a prepara y entrega tur jaarrekeningen te cu 2024;

un reorganisacion structural cu un Supervisory Board nobo;

un director nobo;

y introduccion di un Begunstigd Beleid pa reposiciona FreeZone Aruba NV y atrae mas invercion y negoshi nobo pa FreeZone Aruba NV.

Desde februari 2026, FreeZone Aruba NV tambe tin un Director nobo: Sr. Walter Mosher, un young professional di Aruba cu despues di un carera internacional a tuma e desicion pa regresa na su pais pa contribui na su desaroyo.

Durante e reunion di awe, FreeZone Aruba NV a presenta su presupuesto pa 2026.

Pa aña 2025, e ganashi preliminar di FreeZone NV tawata AWG 482.000, cu ta un logro impresionante despues cu FreeZone Aruba NV pa hopi aña tawata haci perdida. Na aña 2024 FreeZone Aruba NV a haci su promer ganashi despues di hopi aña y pa 2025 ta mustra cu FreeZone Aruba NV lo haci un ganashi di AWG 482.000.

Pa 2026, e proyeccion ta ganashi ta AWG 282.000, reflehando e invercionnan importante den mantencion di edificio y den atrae negoshi nobo pa establece nan mes den FreeZone Aruba NV.

Cu e Begunstigd Beleid nobo awor den vigor, y e cambio structural cu a wordo implementa den e organisacion, nos ta premira un era nobo pa FreeZone Aruba NV.

Un di e obhetivonan di mas importante di Minister di Finansa, Economia y Sector Primario ta pa diversifica e economia di Aruba. Cu pasonan concreto, manera e Begunstigd Beleid nobo pa FreeZone Aruba NV.