Minister Geoffrey Wever a duna gastcollege Staatsrecht na un grupo

Na studiantenan di Universidad di Aruba

ORANJESTAD (AAN): Minister di Finansa, Asunto Economico y Sector Primario, mr. Geoffrey Wever, a duna un gastcollege na studiantenan di Facultad di Ley na Universidad di Aruba riba e tema di Staatsrecht.

   Durante e sesion, Minister Wever a comparti cu e studiantenan tanto e base teoretico como e experencia practico di Staatsrecht, cu ta regla e organizacion di estado, e relacion entre Parlamento y Gobierno, y e posicion di e ciudadano den nos sistema democratico. E combinacion entre teoria y practica a brinda e studiantenan un perspectiva unico riba con derecho di estado ta funciona den realidad.

   Prome cu su entrada den politica, Minister Wever a traha como Wetenschappelijk Medewerker di Staats- y Bestuursrecht na Universidad di Aruba, unda el a contribui activamente na enseñansa y investigacion academico. Awe, como minister di Gobierno, e por añadi na e teoria un dimension practico basa riba experencia propio den ehecucion di responsabilidad ministerial.

   Minister Wever a expresa: “Pa mi ta un honor pa comparti conocemento cu e generacion nobo di hurista. Staatsrecht no ta solamente teoria; e ta biba y ta move den e dinamica entre Parlamento y Gobierno. Educacion y formacion di nos hubentud ta fundamental pa fortifica nos estado di derecho.”

   Minister Wever ta desea tur studiantenan hopi exito den nan estudio y nan futuro carera profesional, y ta sigui comprometi pa contribui activamente na formacion di lidernan y profesionalnan di mañan.