Minister Geoffrey Wever a describi Johnny Habibe como pionero di radio na Aruba

ORANJETSAD (AAN): Ministro di Comunicacion, Geoffrey Wever, a duna algun palabra riba recien fayecimento di Johnny Habibe,

kende lo keda recorda como un figura historico y prominente den radio difusion di Aruba. Su pasion y dedicacion pa radio, den combinacion cu su talento unico, a keda claro y evidente den su trayecto largo y significativo cu a dura mas cu medio siglo. E tabata un pionero, un mentor, y un maestro pa hopi hende na Aruba y tambe mas leu.

   Johnny tabata un persona cu semper tabatin e porta habri pa tur hende. No tabatin diferencia si tabata un ciudadano comun of un figura den politica, e tabata cordial y profesional, semper dunando espacio pa informacion y dialogo honesto. E programa "Pueblo ta Papia" ta un testimonio di su compromiso pa duna e pueblo Arubiano un bos den dialogo democratico y obhetivo.

   Su dedicacion y impacto ta algo cu lo keda den nos curason y lo sigui inspira esnan cu ta bini tras di dje. Johnny a dedica su bida pa nos comunidad y pa eleva e nivel di comunicacion den nos isla.

   Como Minister di Comunicacion, mi ta expresa mi mas profundo condolencia na su famia, amigonan, y tur esnan cu Johnny a toca den su bida. Nos a perde un gran pionero, pero su legado lo keda pa semper y su trabao lo sigui vibra den tur esnan cu Johnny a inspira.