Militarnan a train pa varios luna riba un replica exacto di cas di Nicolas Maduro

Atake riba Venezuela

• Ta sospecha cu un Bodyguard ta e persona infiltrante cu a duna Merca tur detaye 

CARACAS: Ora cu Diasabra mainta a habri, ora cu tur hende na Venezuela ta puntrando nan mes ta kico ta pasando, y unda Nicolas Maduro ta, e contesta a bin den un mensahe difundi door di President Donald Trump di Merca, kende a confirma cu tropanan Mericano a captura y saca Nicolas Maduro di Venezuela, despues di a lanza un atake “di gran escala” contra e pais.  Trump a warda te ora cu Maduro ta abordo di e barco amfibico USS Iwo Yima prome cu el a divulga e captura.

   “Merca a caba di ehecuta cu exito un atake di gran escala contra Venezuela y su lider, president Nicolas Maduro, kende hunto cu su casa, a wordo captura y saca di e pais,” el a indica den un mensahe.

   E accion tabata un sorpresa, pero segun fuentenan cu tabata na altura di e asunto, e planning di un di e operacionnan Mericano mas complica di ultimo temponan a bin ta wordo prepara desde varios luna pasa caba, y hasta tabatin training detaya riba esaki.

   Delta Force den accion: E tropanan elite di militarnan Mericano, incluyendo Delta Force di ehercito, a hasta crea un replica exacto di e cas sigur di Maduro, y nan tabata haci varios training con nan por drenta e cas cu ta fuertemente fortifica.  Trump mes a bisa cu e cas y cambernan tabata wordo proteha pa metalnan di hero.

   Desde luna di Augustus 2025 caba, CIA tabatin na forma secreto un grupo reduci di agentenan cu ta riba teritorio Venezolano, y nan a logra compila datonan clave riba e rutina y custumber di tur dia di Maduro, y aparentemente esaki ta loke a yuda hopi den e accion di Diasabra marduga y su detencion.

   Infiltrante elite: Ademas di esaki, dos fuente mas a indica cu CIA di Merca tabata depende hopi di un colaborador hopi cercano di Nicolas Maduro, y e persona infiltrante aki tabata vigila di forma constant su movimento, y tabata cla pa duna su localizacion preciso en vivo ora cu e operacion a start Diasabra marduga.

   Algun hende a cuminsa pensa cu kizas ta Delcy Rodriguez cu su casa tabata yuda e Mericanonan.  Pero fuentenan mas cercano ta convenci cu un di e bodyguards elite di Maduro mes, ta esun cu tabata duna detaye constant di e paradero di Maduro.

   Maduro tabata drumi casi tur anochi na un localidad scondi, pues tabata depende di e bodyguard aki pa ‘feed’ Mericanonan cu e detaye exacto di su lugar di keda y drumi anochi.  Tin indicacion cu Diasabra marduga, e tabata drumi den un camber-bunker ta Fuerte Tiuna.

   Cera espacio aereo: Pentagon di Merca a manda diferente recurso discreto den e area, cu meta pa suministra combustibel na avionnan durante vuelo, tambe Drone y aparatonan special cu tarea di guera electronico.  Pesey a cera e espacio aereo panort di Venezuela y tambe esun controla pa Curaçao, pa Puerto Rico, y tambe parti pariba di Caribe Oriental.  Pasobra tabatin hopi actividad militar andando, incluyendo re-fueling di avionnan di guera durante vuelo.

   Operacion a start: Tur cos a start banda di 1:45 am, ora algun hende na Caracas a cuminza tende sonido di avion.  Na prome instante nan a djis kere cu ta avion militar Venezolano.  Pero ora cu bombardeo a start poco despues di 2:00 am contra infrastructura di caracter militar, nan a bin compronde loke ta pasando.

   Merca a ataca e.o. e base aereo di La Carlota na Caracas, unda nan a destrui varios vehiculo militar cu ta pertenece na unidad di defensa anti-aereo di Venezuela. 

   E accion di drenta den lugar unda Maduro tabata drumi, lo a dura apenas 12 minuut.  Na salida, algun helicopter a ricibi impacto di bala, pero no a stroba e navenan militar di sigui bula.

   Den edicion awe di DIARIO tin hopi informacion di loke a socede, y tambe tur update cu a sigui den oranan di mainta, merdia, y atardi.  Informacion con celebracion a start varios caminda na Venezuela, aunke Delcy Rodriguez a asumi presidencia, y por a tende Diosdado Cabello na forma arogante indica cu keto bay Chavismo ta na mando.

   Celebracionnan tabatin na Aruba tambe, incluyendo Miami, Madrid, Lima (Peru), y na Santiago di Chile.