Mike Eman y Gerlien Croes apunta como formador di Gobierno

Gobernador a apunta nan...

ORANJESTAD (AAN): Despues cu riba 27 di december 2024 e informador, señora Tisa LaSorte, a entrega e relato final y e declaracion di boluntad (‘bereidwilligheidsverklaring’) di AVP y FUTURO pa formacion di un gabinete nobo na Gobernador di Aruba, Alfonso Boekhoudt, riba Diamars señor Michiel G. Eman, lider di partido AVP, y señora Gerlien L. Croes, lider di Partido FUTURO, a worde ricibi pa Gobernador den cuadro di e procedura di formacion. Señor Eman y señora Croes a worde postula como candidato pa formador door di AVP y FUTURO respectivamente.

   Di acuerdo cu e “Landsverordening integriteit ministers di 17 december 2021 (AB 2021, 203)”, e dos candidatonan formador a worde someti na un investigacion hudicial y tambe un investigacion di seguridad estatal cu nan consentimento. A comunica e resultado di ambos investigacion na Presidente di Conseho Consultativo (Raad van Advies) y na Gobernador.

   En bista di e relato final di e informador, e declaracion di boluntad firma y e resultado di e investigacion hudicial y e investigacion di siguridad estatal riba ambos candidato-formador, Gobernador Boekhoudt a nombra señor Eman y señora Croes como formador diamars 14 di januari. Gobernador a pidi nan pa forma un gabinete stabiel cu tin confianza di e fraccionan di AVP y FUTURO den Parlamento y cu ta consisti di personanan cu ta dispuesto y capaz pa implementa un maneho financiero-economico solido, cu atencion pa costo di bida na Aruba.

   Parti di e encargo di formacion ta trahamento di un acuerdo di gobernacion entre AVP y FUTURO y un reparticion di cartera denter di e gabinete nobo. Finalmente, e eligibilidad di candidatonan pa e funcion di minister y di minister plenipotenciario mester worde evalua previamente a base di e exigencianan y proceduranan stipula den e “Landsverordening integriteit ministers”.

Mas tarda pa dia 18 di februari proximo e formadornan mester informa Gobernador Boekhoudt por escrito tocante nan conclusionnan. Mientras tanto e formadornan lo informa Gobernador verbalmente, of si ta necesario por escrito, tocante e progreso den implementacion di e encargo di formacion.

   A informa e lidernan di fraccion den Parlamento por escrito tocante di e encargo di formacion y di e echo cu señor Eman y señora Croes a tene esaki na consideracion. Si acaso e formacion ta exitoso, e formadornan, manera ta costumber, lo acepta e encargo oficialmente. A haci un suplica na e lidernan di fraccion den Parlamento pa duna nan pleno cooperacion den cumplimento di e encargo di formacion.