Mike Eman lo cumpli cu su promesanan di campaña of defrauda pueblo atrobe?

Marco Berlis (MEP):

ORANJESTAD (AAN):  Mike Eman a los hopi promesa grandi durante campaña na 2024. Un di nan ta e AWG 700.- di aumento pa nos grandinan. Manera e resultadonan di eleccion a drenta, Mike a sali memey di un grupo grandi di hende pafo di Cas di Partido y a bolbe asegura cu den 100 dia e lo percura pa pensioen lo wordo aumenta cu awg 700.- y cu nada lo por stop esaki.

Sinembargo, nos tur por  recorda un Mike Eman desespera na 2009 a priminti cu e lo baha e debe nacional y kita BBO completamente! Kico a sucede? Mike a redobla e debe nacional y a “halveer” BBO na 1.5%, pa despues subie bek mas di locual e tabata ta na 3.5%. Mike Eman lo cumpli cu su promesa di aumento di pensioen? Mike lo cumpli cu loke e la grita pa lunanan largo pa gana e confiansa di pueblo? Of Mike lo defrauda pueblo un biaha mas? 

Algun señal ta indicando claramente kico lo bay sucede.

(1)- Algun luna pasa Minister Geoffrey Wever di partido Futuro a laga SVB traha un rapport riba un posibel aumento di pensioen usando e fondo di SVB. A usa 4 scenario, incluyendo scenarionan cu un posibel aumento den “fase.” E calculacionan y rapport di SVB no ta gaña; E gastonan miyonario ta surpasa 150 miyon florin pa aña y lo aumenta drasticamente tur aña. E rapport ta subraya cu e fondo di SVB lo rementa den 2-3 aña si lo bay aumenta pensioen cu awg 700.-

(2)- Den un rueda di prensa Mike Eman a declara cu e lo financia e aumento di pensioen for di reparatie toeslag, y esaki kiermeen cu Mike lo sac’e directamente for di nos presupuesto. E realidad ta cu no tin e espacio aki den presupuesto pa financia semehante aumento di pensioen. Un rekensom simpel a demostra esaki caba.

(3)- Tanto Gerlien Croes y Geoffrey Wever a indica caba den prensa cu nan NO lo permiti un aumento di pensioen di awg 700.- si nan lo drenta gobierno, pasobra NO tin placa pa esey! Ambos a para firme riba nan declaracion.

(4)- Apenas algun dia despues di a gana eleccion, Mike Eman a cuminsa dal pasonan atras riba su promesa di lo aumenta e pensioen cu awg 700.-! Den un entrevista den prensa recientemente, Mike a cuminsa come su palabranan bek y a expresa di lo re-considera e punto di aumento di pensioen! 

Kico Mike Eman ta dispuesto pa haci pa forma e gobierno nobo?

E pregunta ta; kico Mike ta dispuesto pa sacrifica pa forma un gobierno nobo? Gerlien y Geoffrey a bisa bon cla cu nan no ta di acuerdo pa un aumento di pensioen di awg 700.-! Esaki kiermeen cu Mike Eman lo dobla ora e momento di negocia lo yega, of Mike lo para firme den su sapatonan pa garantisa nos grandinan e aumento cu tanto el a priminti?

Mike a bishita nos grandinan tur caminda, campaña pa mas di dos aña, brasa, hole y primi nos grandinan cu e promesa cu e lo subi pensioen cu 50%! Esaki lo ta otro promesa pa gana eleccion atrobe? Esaki ta e “bon comun” cu Mike Eman ta predica, of e lo ta un farsa comun? Time will tell!