Mike a entrega Aruba prueba cu e no ta confiabel!

Na 2017 el a huy despues cu el a zink pensionado y recien naci di Aruba

*For di 2020 pensionadonan a haya prueba di wega di Mike cu pensioen

*Huez a bisa cu Mike no tabata autorisa pa haci promesa cu e no a cumpli 

ORANJESTAD (AAN) — Si awe un hoben kere palabranan di Mike Eman, ainda por comprende. Pero tur hende cu tabata tin edad di un adulto cu pa ley ta wordo considera capaz pa pensa y asina huzga pa su mes, ta bon na haltura con Mike Eman pa haya voto a hunga cu bienestar di tur Arubiano y directamente a mishi cu e pan cu den cas di tur Arubiano ta subi mesa.

Aruba na 2013 a entrega Mike Eman e futuro di e pais cu e pensamento cu Mike tabata traha na interes di e Pueblo.

Aruba e tempo ainda no a haya oportunidad pa mira con Mike solamente tabata mira con e por segura su mes mas voto mientras family and friends tabata disfruta privilegio cu a rementa den sala di Corte di Aruba y a manda e “back to back”amigo di Mike, Benny Sevinger, prison.

Na 2014 Reino Hulandes a bisa ta basta. Pues no tabata contrincantenan politico Arubano cu a lanta para contra Mike Eman, pero Reino Hulandes cu a uza Statuut pa pone un fin na abusonan di Mike Eman contra e Arubiano.

Na 2013, ora Mike tabata sa cu su victoria grandi a base di su manipulacion politico di Pueblo lo a rementa, el a haya oportunidad pa drenta den contacto cu Nicolas Maduro, cu mester a bira su salbador y asina a hinca Aruba den su proximo aventura, cu tabata Citgo, cu a bira desaster pa e Pueblo di Aruba.

Cu e mentira grandi cu Aruba lo wordo transforma den un paraiso, Mike Eman a cumpra speransa falso cerca e votador Arubano, cu na 2017 no tabata sa sikiera kico lo pasa cu e pais, cu Mike Eman a zink riba tur tereno.

Ora Mike a perde eleccion el a huy manera cobarde so por huy y a laga Aruba atras den un desesperacion ya cu ningun instancia oficial por a bisa cu palabra concreto kico lo a pasa cu Aruba.

Aruba a baha Mike Eman como Prome Ministro despues cu Mike Eman a entrega prueba cu e no merece confiaza di Aruba cu el a hinca den debe, den scandal, den incertidumbre total.

For di 2017 Aruba tabata tin e prueba palpabel cu no por confia e persona di Mike Eman como lider di Aruba y pensionadonan sigur mester ta na haltura di e berdad aki, despues di nan experencia cu e promesa falso di Mike Eman.

Awe cu mundo tin problema grandi cu asuntonan di pensioen di behez y paisnan grandi manera Hulanda ta busca formulanan pa reorganisa areglonan social di grandinan, e recuperacion financiero di Aruba a haci posibel pa Aruba por cumpli cu necesidadnan grandi di e pueblo cu tabata na peliger.

Pero tin promesanan falso cu Mike Eman a haci Pueblo di Aruba mientras Mike Eman tabata destrui e situacion financiero di e pais, cu cual Gobierno no por a cumpli.

Den edicionnan di DIARIO por topa cu e informacionnan di 2020 cu ta indica con e organisacion di pensionadonan OPPA a perde un caso cu nan a cuminsa den Corte contra Gobierno a base di e promesa di Mike Eman pa eleccion 2017 cu e lo a paga e gelijk bedrag.

Sinembargo, Mike Eman no a cumpli cu su palabra y manera henter Aruba ta na haltura no a laga placa pa nada tampoco pa paga loke el a priminti e pensionadonan.

Segun e veredicto di Huez, Mike no tabata autorisa pa hacui e promesa aki y cu e promesa aki tabata ilegal. Es mas, pensionadonan no por a reclama e suma aki pa cual no tabata tin placa y cu nunca Mike a regla manera mester tabata.

Awe den porta di eleccion 2024, Mike Eman cu a perde no solamente votador pero hasta su candidatonan, ta bolbe uza pensionadonan pa e por haya vota y ta exigi pa aumenta pensioen a base di reparatie toeslag.

Tristo ta cu Mike Eman ta hunga cu situacion financiero di Arubianonan pa e por por haya vota, cu aparentemente ta e unico balor den bida di Mike Eman, cu ta uno di e politiconan cu mas placa a haya cerca Pueblo for di e momento cu el a bira politico.

Practicamente ta placa di Pueblo di Aruba tabata e unico fuente di entrada di Mike Eman, cu den su Penthouse na uno di e lugarnan mas caro di Aruba, ta sigui uza necesidad di Pueblo di Aruba, cu pa su motibo a keda den problema despues cu el a destrui e situacion financiero di e pais.

Mike Eman mester ta na Aruba cu pa cumpli cu su promesa falso cu pensionadonan Aruba anualmente mester presta 100 Miyon cu Pueblo mester paga cu interes hunto cu e placa cu ya Pueblo ta paga pa e maneho financiero abusivo di Mike Eman, cu atrobe ta duna prueba con e ta hunga cu necesidad di Pueblo pa por haya voto pa e por sigui cobra salario den Parlamento di Aruba!