Miguel Mansur ta mira salvacion Aruba den droga!

Reaccion publico ta splica pakico Accion 21 no ta yega mas leu cu 2024

*Testament Miguel den Parlamento ta mira soft drugs como gran futuro

*E ta cumpli cu su promesa di campaña cu a bira rechazo di Pueblo 

ORANJESTAD (AAN) — E siman aki e Miembro di Parlamento di Aruba, Miguel Mansur, a entrega loke mester bira e yabi pa “soft drugs”wordo legalisa na Aruba.

Miguel Mansur cu a representa su partido Accion 21, cu a wordo introduci na Aruba na 2021, den Parlamento di Aruba, lo no bolbe como representante di Pueblo di Aruba ora e actual constelacion di Parlamento mester despedi a base di e resultado di eleccion.

Pa Miguel Mansur y su grupo di votadornan cu ta sostene su pensamentonan, mester tabata obvio, cu Pueblo a rechaza e posibilidad cu e y su partido Accion 21 tabata brinda pa e asina yama “soft drugs”manera Marihuana, lo duna inicio na legalisacion di soft drugs, cu rond mundo ta productor di problemanan social cu Aruba tambe conoce.

Abuso di droga ta percura pa problema serio pa adictonan y pa e pais y ta wordo considera productor di problemanan cu ta cuminsa cu kiebra di un problema personal, pa termina den un cantidad creciente di caso den morto di victimanan cu e ta produci.

Rond mundo droga ta wordo considera enemigo number uno di e stabililidad personal y di comunidad, pero segun a bini dilanti den publicidad na Aruba, Miguel Mansur mes ta considera cu soft drugs ta hustamente e solucion grandi cu Aruba tabata spera pa soluciona tur su problemanan.

DIARIO a wordo confronta cu informacion di lectornan cu a entrega copia di publicacion den cual Miguel Mansur ta alaba uzo di soft drugs como e forma pa comporacion mas social, mihor salud, reduccion di crimen y hasta aumento di libertad individual di hende cu ora nan ta droga cu soft drugs, segun Miguel Mansur nan ta mas liber.

Informantenan ta mustra cu Miguel Mansur no a trece dilanti kico ta resultado di e libertad individual di hende cu droga ta produci y cu ta hustamente e motibo cu autoridad ta actua ora nan ta recoge usadornan di droga riba caya, caminda balor di hende ta muri den condicionnan cu ni pa animal comunidad ta considera acceptabel.

Ta conoci cu tin remedi cu ta haci uzo di cierto gradonan di soft drugs, pero ta conoci tambe cu uso continuo y uso di droga na cantidad halto, hasta por conduci na morto di personanan manera na cierto paisnan ta wordo aplica den casonan di personanan cu ta muriendo y ta den agonia total, aunke esaki tambe ta wordo rechaza dor di hopi grupo y no ta wordo aplica sin mas.

Pa Miguel Mansur, sinembargo, e hecho cu e no ta bolbe den Parlamento di Pueblo di Aruba, cu a vota pa e keda cas y Accion 21 bay descansa por lo pronto na paz, a haci necesario pa e percura pa e iniciativa di ley cu ta habri porta pa legalisacion di droga, wordo entrega na Presidente di Parlamento.

Mester conclui aki pues, manera ya ta bini dilanti, cu aparentemente Miguel Mansur no por razona cu loke el a priminti cu e lo haci si e bolbe den Parlamento, cu ta pues legalisacion di soft drugs, ta hustamente e motibo cu Pueblo a dicidi cu e no ta drenta Parlamento.

E resultado di eleccion 2024 a haci cu e iniciativa di Ley pa legalisa droga soft na Aruba, no a bira un accion cu resultado pa Miguel Mansur den Parlamento pero a bira un testament politico cu e ta laga atras como su deseo pa Pueblo di Aruba, cu a prefera di acuerdo cu e cantidad di voto cu el a ricibi, pa e keda cas y laga e negoshi di droga soft di Aruba pa loke e ta.

Proximamente Miguel Mansur ta bandona sala di Parlamento y no ta conoci con e lo sigui cu su accion pa legalisa droga na Aruba.

Informantenan ta indica cu hecho ta, cu Accion 21 di Miguel Mansur awor ta bira Accion 24 di Pueblo cu a cera porta di Parlamento pa Miguel Mansur, cu aparentemente no ta capaz di comprende e mensahe cu el a ricibi den eleccion y no ta comprende cu Pueblo di Aruba obviamente no ta interesa den un embahador di soft drugs den Parlamento y cu Pueblo ta prefera di sigui cumpra su remedi na boticanan y no den cayanan scur caminda hobennan ta entrega nan porvenir na mas y mihor crimen, cu ta aumenta nan libertad individual pa no keda riba caya pero pa bay biba den prison.

DIARIO teniendo cuenta cu etica periodistico y leynan cu no ta permiti publicacionnan di cierto palabranan ta abstene finalmente di reproduci pa su lectornan palabranan cu a bini dilanti di parti di lectornan, cu a splica DIARIO kico exactamente segun nan opinion, Miguel Mansur mester bay haci cu soft drugs cu e ta considera e yabi pa futuro di Aruba,  caminda Accion 21, por lo pronto ta descansa na paz.