“Mi ta kere ampliamente cu mester sondea e posibilidad di crea otro pilar”

Parlamentario Edgard Vrolijk:

*Pa loke ta e refineria pariba! 

ORANJESTAD (AAN)-- Parlamentario mr. Edgard Vrolijk, di fraccion di MEP, a declara den entrevista cu Matutino DIARIO, cu Aruba ta habri pa tur inversionista.

Aruba mester progresa y e no por keda para, esey no tin duda riba dje.

No obstante, el a referi na e Ley di Inversion, cu Minister di Economia y Finanzas ta bay introduci.

“Esey kiermen, cu Gobierno di su presupuesto ta hinca placa pa aña, 60-70 miyon p’asina por inverti den cierto areanan, anto den mi concepto nos por hinca e placa den e fondo di calamidad, cu nos por yuda e ciudadano. Pero cu nos por atrae mas inversionista na e pais esey nos por biba cu ne, mi no tin critica riba esey”, Edgard Vrolijk a señala.

E parlamentario ta kere ampliamente cu mester sondea e posibilidad cu Aruba por crea otro pilar, pa locual ta e refineria pariba. “Vooral e tankinan cu ta drumi eynan, cu ta perdiendo placa, p’esey tambe nos a pidie pa ta akinan. Cu e kier atrae otro inversionistanan ta welcome den e pais aki, esey no tin problema; pero si, nos inversionnan mester ta diferente”, e parlamentario a subraya.

El a agrega cu mayoria di e proyectonan cu a bin dilanti ta basa  hopi riba airb&b, kiermen, bay sigui traha lugar pa e turistanan, bay sigui amplia y crea mas problema social y economico den e pais aki, segun Edgard Vrolijk ta remarca.

“Nos no tin vivienda, no tin lugar di biba, prijsnan ta subi, kiermen nos tin wak kico nos kier si. Mi ta corda cu un tempo señor Wever kier a bin cu e Wheel grandi, mi no a tende mas ki a pasa cu ne. Kiermen, inversionnan cu den mi concepto, na e momentonan aki, personalmente mi no ta kere den esey. Mi ta kere cu ta crea un bista hopi mahos si bo pone un wheel grandi, cu mi ta kere e no ta pas cu e concepto di Aruba. Bo no por coi tur concepto di afo tira benta aki na Aruba. Nos mester wak kico ta traha akinan, esey ta mi pensamento, cu e ta ferfelo. Un bunita bista cu bo tin akinan, mañan como turista ken ta para akinan bo no por wak ni pafo, un wheel grandi bo ta wak” e parlamentario a reitera.

El a remarca cual ta e modelo cu nos kier akinan y kico ta inversionistanan y e turistanan cu nos kier na Aruba: turista di calidad of un masa turista? Cu ta locual ta pasando akinan cu tur hende ta kehando. El a menciona cu mescos cu e ta scucha nan hopi biaha papia di turismo Europeo. “Cual turismo Europeo bo kier? Esun cu no ta bin laga un tips? Of bo kier esun cu ta bin gasta den nos pais. Nan ta discusionnan sano cu nos tin cu hiba”, Vrolijk a comenta. Finalmente e ta cuestiona cu e minster ta lanta bay sin informa kico ta su vision, kico ta su plan, na unda e ta bay inverti, kico ta e proyectonan cu e tin, cual ta e inversionistanan cu e ta bay crea. “Esey pa nos, nos ta den scuridad cu esey”, Parlamentario Vrolijk a conclui.