Mester tin un plan concreto pa controla deramento di bestia y pa proteha e ecosistema local

Director di DNM ta enfatisa:

ORANJESTAD (AAN):   Director di Directie Natuur en Milieu, Gisbert Boekhoudt a trece dilanti relaciona cu e tema di santana di cacho, cu e area aki tin su atencion, pero ainda DNM no a wak un proyecto concreto con e lo wordo adresa.

            El a indica cu antes esaki tabata un area chikito, pero el a sigui crece ora cu mas y mas hende ta yega eynan pa dera pushi y cacho na unda nan ta kere ta bon. No tin un maneho riba esaki. E deramento di bestia por tin consecuencia pa naturalesa riba su mes, pero incluso pa hende tambe.

            Segun Boekhoudt, ta obvio u e hotel mes of esnan cu tin interes pa e hotel, pa e becindario, e ta bin cu un peliger ademas cu e ta daña e bista. Asina cu tin un 'dossier project' concreto DNM por duna advies. A bisa caba cu mester tin hende cu ta responsabel pa esaki y cu por haci e trabao. Sea ta percura pa organisa of percura pa e bestianan cu no ta bon dera.

            El a agrega cu diferente horcan a pasa cu a pusha full e seronan di santo bay mas pabao. E duinnan cu tabatin antes na santana di cacho a bay, pero den lama tambe e coralnan tambe a wordo movi mas pa direccion di Baby Beach.

            Horcan Ivan y Matthew tabatin su impacto riba e area ey y ta keda algo cu ta den e zona di coriente ora lama ta hopi bruto ora tin horcannan. Mester percura pa e bestianan cu a wordo dera tin un profundidad suficiente. Si nan ta na superficie nan lo por keda exponi y esey lo por tin consecuencia pa hende y pa fauna den e area, el a splica.

            DNM ta boga pa e matanan cu tin eynan keda eynan pasobra nan tin un funcion den naturalesa. E magelnan cu ta mas pabao, nan lo keda na nan luga pasobra nan ta mas fuerte. Nan lo yuda pa e tereno y e area keda den un miho condicion, Gisbert Boekhoudt a expresa.