The content originally appeared on:
Diario
Prome Minister a destaca algun di e logronan di Ing. Croes como director:
ORANJESTAD (AAN) —Minister Presidente, Evelyn Wever Croes, den conferencia di prensa di Dialuna a expresa, cu ta toca su persona anuncia cu e Director di DOW, Ing. Marlon Croes, algun siman pasa a inform’e cu e lo kier tuma su retiro, entrante 31 di December di e aña aki.
“Señor Marlon Croes, 35 aña pasa a bolbe for di Hulanda y a bay traha na DOW, y ultimo 20 aña tabata Hefe, Director na DOW. Un decision asina no ta un decision facil. Mi ta identifica cu ne hopi ora nos ta combersa riba e tema aki pasobra mi tambe a bin 35 aña pasa for di Hulanda, y bo ta pensa cu bo ta keda traha den gobierno pa un tempo cortico.
Cerca Marlon Croes lo ta mesun cos, sinembargo, circumstancianan cada bez a haci apelacion riba dje, y el a keda 35 aña den servicio di Gobierno: 20 aña como director di e departamento bao di cual e departamento a mira cambionan hopi importante y positivo, y proyectonan grandi cu a wordo realiza.
Aparte di ta director di Departamento di DOW, tambe señor Croes a participa den diferente Comision, na diferente momento cu tabata importante, y algun di e resultadonan hopi importante cu nos por mira e implementacion di e plan, pa nos trafico por circula mas eficientemente den Playa. Esakinan tabata cambionan hopi importante cu mester a tuma lugar algun tempo pasa. Tambe pa loke ta trata e stacion di bus LG Smith Boulevard, e diseño y ehecucion di e proyecto aki ta uno cu nos ta wak atras como algo importante”, Minister Presidente a bisa.
El a agrega cu pa loke ta e rotondenan, e mandatario a menciona cu na momento cu Marlon a bira director di DOW, Aruba a haya hopi rotonde. “Y mester a bin, naturalmente, cu areglonan, cu reglanan ken tin preferencia, con e reglanan di preferencia ta, y con nos ta duna un forma nobo na nos rotondenan”, Minister Presidente a indica.
El a agrega cu tambe e caminda grandi entre Tanki Flip cu Pos Abao. “Si bo pensa bek casi bo no por pensa cu e caminda ey no tabata existi, pero tabata tin un tempo cu e no tabata existi. Y danki na e esfuerzonan aki di Marlon y su ekipo, nos tin e caminda aki cu aworaki ta un ader hopi importante pa trafico na Aruba”, Premier Wever-Croes a remarca.
Mudamento di waf y container na Barcadera, tambe tabata un trabao hopi grandi. “No ta algo cu pasa hopi na Aruba, mudamento di waf, pero den e caso aki nos tin esaki como un di e logronan importante. Embeyecimento di e centro di ciudad, na Playa, ta un di nan tambe, y e proyectonan PPP cu ta Green Corridor y Watty Vos Boulevard, cu a exigi un coordinacion enormemente grandi, pero esaki a pasa bao liderazgo di señor Marlon Croes y ekiponan di DOW”, e dignatario a remarca.
Finalmente, Prome Minister a gradici ing. Marlon Croes pa e añanan di servicio dedica na gobierno. “Ta añanan dedica no solamente na DOW y su personal, pero na henter Aruba. Profesionalnan cu ta bin di exterior ta traha un tempo na gobierno, y hopi biaha ta scoge pa bay trempan caba den sector priva; den e caso aki señor Marlon Croes a scoge pa keda traha na interes general di Aruba”, Minister Presidente, Evelyn Wever-Croes a conclui.
